Palitolah Vital Silicki kamentuje vyniki Dnia Voli.
Akcyja pakazała, što jość usio ž taki peŭnaja častka niezaležnaha hramadztva, zdolnaja vychodzić na vulicy. Tamu kali nie skazać, što heta byŭ pośpiech, to ja b i nie zapisaŭ hetuju akcyju, jak pravał apazycyi.
Što tyčycca ŭładaŭ, to tut adbyłasia vielmi cikavaja metamarfoza. Taki truk, jak śviatočny kancert «Za niezavisimuju Biełaruś» — heta taksama znakavaja padzieja, jakuju jašče treba asensoŭvać. Adnak było zaŭvažalna, što ŭ pieršaju čarhu pad upłyvam vonkavaha cisku va ŭłady siońnia byli ŭ peŭnaj stupieni źviazanyja ruki i taho, što možna było čakać — «chapunu», masavych aryštaŭ i źbićcia, nie adbyłosia
Mnie pryhadvajecca takaja histaryčnaja analohija — usie chryścijanskija śviaty byli kaliści padahnanyja pad pahanskija, kab chryścijanstva było lepš uspryniataje masami. Režym Łukašenki zaraz sprabuje zrabić štości padobnaje z tym nacyjanalnym repertuaram, jaki moža skłaści niejkuju maralnuju, duchoŭnuju alternatyvu hetaj uładzie, hetaj palityčnaj, idealahičnaj i kulturnaj hiehiemonii, jakaja panuje zaraz u krainie.
Hetak adbyłosia kaliści ź lozunham «Za Biełaruś». Ja nahadaju, što heta byŭ lozunh pieradvybarčaj kampanii BNF u 1990 hodzie. Pahladzim , ci paŭtarycca hety maraton niezaležnaści u nastupnym hodzie. Sioleta pa telebačańni abviaścili, što prosta dobraje nadvorje nadyšło, dyk voś pačynajem 25 sakavika. Ale zadumka mienavita takaja — kanvertacyja, kamuflaž.
Takija rašeńni — zaŭsiody pałka z dvuma kancami. Kali ŭłada sprabuje pryvatyzavać hetaje śviata, jana stvaraje peŭnuju lehitymnuju prastoru dziejańniaŭ i dla inšych, u tym liku i dla apazycyi. Alternatyva moža pad hetaj markaj razhortvać pracu pa papularyzacyi niejkich alternatyŭnych idejaŭ.
Kab my pieratvaryli 25 Sakavika ŭ śviata ŭsich, treba da ŭsich i iści, nie zabivacca ŭ svaju rezervacyju. Navat kali jana na płoščy kala Akademii navuk, a nie Banhałory — užo štości lepšaje.
Ułada taksama prademanstravała, što jaje «dyjaloh» z alternatyŭnym hramadztvam idzie movaj milicejskich kardonaŭ, jakich siońnia było prosta nieźličona. Ja zaraz u Miensku siadžu ŭ zavułku kala vulicy Daraševiča, tut jašče niadaŭna stajała vielizarnaja kalona aŭtazakaŭ. Ułada była hatovaja da siłavoha scenaru. Prosta demanstranty siońnia nie pajšli ni na jakoje abvastreńnie i tamu ničoha nie adbyłosia.
U toj ža čas ruki va ŭłady byli źviazanyja eŭrapejcami , što vialikaha «chapunu» ŭłada vyrašyła paźbiehnuć. Mahčyma, hety scenar uźnik litaralna napiaredadni akcyi, bo litaralna za niekalki dzion da 25 sakavika ŭźnikła hetaja zajava pra maraton «Za niezaležnuju Biełaruś.
Ułady chacieli b pajści na dyjaloh z Zachadam , ale tak, kab ni za što nie adkazvać i nia być nikomu abaviazanymi.
