Adkaznaść za biaśpieku budučaj biełaruskaj AES niasie Rasija, zajaviŭ Alaksandr Łukašenka 22 červienia ŭ Minsku na sustrečy z maładymi hramadaznaŭcami.
Łukašenka ličyć biespadstaŭnymi apasieńni adnosna biaśpieki budučaj stancyi. Jon abhruntavaŭ heta ŭ tym liku tym, što pa pierymietry Biełaruś užo akružana dziejnymi AES: «My ŭ atačeńni hetych stancyj. Što ŭžo bajacca? My ž budujem samuju biaśpiečnuju stancyju, i adkaznaść tut niasie i svajoj reputacyjaj, i ŭsim, čym tolki možna, Rasija».
«Ja naohuł dumaju pra toje, što hety čarnobylski sindrom prachodzić, i nie pry mnie, dyk pry jakim inšym prezidencie vy budziecie budavać u Biełarusi jašče adnu atamnuju stancyju»,— pryvodzić słovy Łukašenki
Na jaho dumku, pieraškodzić budaŭnictvu AES sprabujuć «u asnoŭnym siły, hałasy jakich prapłačanyja, samym zvyčajnym čynam prapłačanyja, i da hetaha padklučana naša «piataja kałona».
«Bolš za ŭsio litoŭcy i palaki kryčać, — zajaviŭ Łukašenka. — Rasijanie nie kryčać, tamu što heta ich prajekt. Im treba dakazvać usiamu śvietu, što jany budujuć pryhožyja biaśpiečnyja stancyi. Kankurencyja tut vialikaja. Ale davajcie pahladzim ź inšaha boku: litoŭcy svaju stancyju płanujuć litaralna za paru kiłamietraŭ ad našaj. Dyk kali vy kryčycie, što niebiaśpiečna, drenna i hetak dalej, čamu vy tut ža budujecie?.. Palaki dźvie atamnyja stancyi chočuć pabudavać. Ale ŭsia prablema ŭ tym, što my tut ich apiaredzili. Toj, chto napieradzie, toj vyjhraje. My atrymajem elektraenierhiju i možam pradavać na rynki nie tolki ŭ Biełarusi, ale i pobač. A heta ž kankurencyja. I ŭ hetaj kankurentnaj baraćbie jość ludzi, jakija prapichvajuć čyjeści intaresy. Nie biaspłatna. Heta ich biźnies».
