Homielskaja kandytarskaja fabryka «Spartak» vyjhrała ŭ kampanii «Rašen» (Ukraina) baraćbu za tavarny znak «Barbarys», paviedamiŭ sajt biełaruskaha pradpryjemstva. Pasiadžeńnie kalehii pa spravach intelektualnaj ułasnaści Viarchoŭnaha suda Biełarusi adbyłosia 14 červienia.
20 krasavika 2010 hoda Nacyjanalny centr intelektualnaj ułasnaści Biełarusi zarehistravaŭ tavarny znak «Barbarys» za kampanijaj «Rašen». «Spartak» źviarnuŭsia ŭ sud sa skarhaj, «bo jamu jak uładalniku tavarnaha znaka «Barbarys» rašeńniem Apielacyjnaha savieta pry patentnym orhanie było admoŭlena ŭ zadavalnieńni piarečańnia suprać davańnia pravavoj achovy ŭ Respublicy Biełaruś słoŭnamu tavarnamu znaku «Rašen Barbarys», zarehistravanamu na imia daččynaha pradpryjemstva «Kandytarskaja karparacyja „Rašen“ (Ukraina)».
Jak havorycca ŭ paviedamleńni, sudovaja kalehija admianiła rašeńnie Apielacyjnaha savieta zychodziačy z nastupnych faktaŭ. Słoŭnaje abaznačeńnie «Barbarys» na praciahu doŭhaha času, prykładna z 1939 hoda, vykarystoŭvałasia na terytoryi SSSR, Respubliki Biełaruś roznymi vytvorcami kandytarskich vyrabaŭ dla markiroŭki karamieli «Barbarys», pry hetym receptura hetaj karamieli zastavałasia niaźmiennaj i ŭvachodziła va ŭnifikavanyja zborniki receptur 1939, 1970, 1986 hadoŭ.
Taksama, jak vynikaje sa spravazdačy pa temie «Vyvučeńnie asablivaściaŭ usprymańnia abaznačeńnia „Barbarys“ nasielnictvam Biełarusi», nazvanaje abaznačeńnie viadoma 88,7% apytanych; kožny piaty respandent (22,3%) nazvaŭ u jakaścifirmy-vytvorcy kandytarskuju fabryku «Spartak», i tolki 5% apytanych ličać, što heta fabryka «Rašen».
Sudovaja kalehija pryjšła da vysnovy, što pry markiroŭcy adnarodnych tavaraŭ padobnymi tavarnymi znakami «Barbarys» i «Rašen Barbarys» u spažyŭca moža stvarycca ŭjaŭleńnie ab prynaležnaści ich adnamu vytvorcu. Było ŭstanoŭlena, što pieravahu ŭ pravavoj achovie maje tavarny znak, prava na jaki ŭźnikła raniej.
U vyniku skarha kandytarskaj fabryki «Spartak» padlahaje zadavalnieńniu, a rašeńnie Apielacyjnaha savieta ad 21 vieraśnia 2011 hoda — admienie.
Davańnie pravavoj achovy tavarnamu znaku «Rašen Barbarys» pryznana niesapraŭdnym. Rašeńnie abskardžańniu i apratestavańniu ŭ kasacyjnym paradku nie padlahaje, paviedamlaje «Spartak».
