6 lipienia na chutary la pasiołka Bobr (Krupski rajon Minskaj vobłaści) za 125 kiłamietraŭ ad Minska adbudziecca tradycyjnaje śviata Kupalla, udzieł u jakim mohuć uziać lubyja hurty i vystupoŭcy. Čamu varta pryjechać na Kupalle, jak znajści svaju paparać-kvietku dy stvaryć ščaślivuju siamju raspavioŭ arhanizatar i haspadar śviata, uradženiec vioski Bobr, mastak i majstar pierformansu Aleś Puškin.
TH: Spadar Aleś, čym hetym razam budziecie pryvablivać publiku?
AP: U noč z 6 na 7 lipienia zaprašaju ŭsich žadajučych pašukać paparać-kvietku na maim chutary.
Haściej čakajuć vohnišča ŭ dva čałaviečyja rosty, sapraŭdny biełaruski krupnik na miodzie, čyściutkaja kryničnaja vada, haračaja łaźnia, dobraja muzyka i, biezumoŭna, mahija kupalskaje nočy.Našaje śviata ŭžo stała tradycyjnym i adbyvajecca na praciahu 15 hadoŭ.
TH: Chto z muzykaŭ budzie hrać?
AP: Na śviata čakajucca mienskija dudary, a taksama kapieła Alaksieja Krukoŭskaha «Kapieła na Taku». Ale ja zaklikaju ŭsich vystupoŭcaŭ i hurty dałučacca da našaj dziei. Ja harantuju, što takoj ciopłaj sustrečy ad aŭdytoryi jany nie atrymajuć anidzie. Płanujecca, što vystupy buduć akustyčnymi, ale pry patrebie znojdziem i aparat.
TH: Kažuć, što na Vašym śviacie niekatoryja znachodzili paparać-kvietku?
AP: Ja i sam jaje znajšoŭ: u nas užo dvoje dzietak, i my ščyra marym ab trecim. Na kožnym Kupalli hledačy abirajuć Kupalinku i Kupaliča viečara — samych hožych dziaŭčynu j chłapca. Skažacie «dziŭna», ale jany praź niekatory čas biarucca šlubam. A paśla znoŭ zavitvajuć na Kupalle ŭžo ź dzietkami, kab vybrać novych hierojaŭ. Žadajecie pravieryć — pryjaždžajcie da nas!
Słovy Alesia Puškina paćvierdziła j abranaja Kupalinka 2010 hoda, kulturnicki mieniedžar fonda «Kreŭski zamak» Hanna Andrukovič: «Vyhladaje cudam, ale sapraŭdy mienavita ź lohkaje ruki Alesia my pašlubavalisia z maim Kupaličam. Da hetaha času toje śviata pomnicca, jak ciapier».
Pačatak śviata a 22-j 6 lipienia.
Padrabiaznaja infarmacyja praz telefon +375 29 606-82-06.
