Žychary Ivianca: Skinutych z samalota miadźviedzikaŭ sabrała milicyja 13

Novaje videa: samalot nad Minskam:

Žychar Ivianca Vincent Sołtan paćvierdziŭ «Našaj Nivie», što ŭčora ranicaj, prykładna a 8-j ranku, niejki samalot pralacieŭ nad jaho chataj.

Pa słovach Vincesia, samalot lacioŭ davoli nizka, jon navat padumaŭ, što budzie sadzicca. Sp. Sołtan — stolar. Jon žyvie ŭ toj častcy Ivianca, što bližej da vyjezdu ŭ bok Nalibockaj puščy, daloka ad centralnaj płoščy.

Śviatłana Turko, supracoŭnica miascovaha ŽKH, paviedamiła pra čornyja pakunki, skinutyja z samalota, kiraŭnictvu miascovaha ŽKH.

Jaje vyklikali ŭ milicyju, dzie jana pabačyła niekalki tych samych pakunkaŭ, u jakich sapraŭdy znachodzilisia parašuty z prymacavanymi cacačnymi miadźviedzikami i cydułkami na zamiežnaj movie.

Pradprymalnik Anatol Roman paćvierdziŭ, što bačyŭ, jak samalot raskidvaŭ čornyja pakunki i jak jany ŭpali na vulicu.

Jon navat sfatahrafavaŭ ich na kamieru mabilnaha telefona, ale paśla vydaliŭ, bo pabajaŭsia nastupstvaŭ dla samaho siabie.

Valery Mazura kaža, što taksama bačyŭ samalot. Mazura ćvierdzić, što z samalota sapraŭdy skidali miadźviedzikaŭ.

Mazura kaža, što cacki prybirali supracoŭniki miascovaj žyllova-kamunalnaj haspadarki. Žycharka Volha Hałavanava taksama paviedamiła, što bačyła, jak samalot raskidvaŭ niejkija pakunki.

Hetyja śviedčańni zapisali žurnalisty radyjo «Svaboda».

Miž tym Minabarony Biełarusi praciahvała śćviardžać, što videa palotu šviedskich piłotaŭ nad Biełaruśsiu źjaŭlajecca mantažom i «hruba sfabrykavanaj pravakacyjaj».

«Daśledujučy pradastaŭlenyja fota i videamateryjały, ekśpierty vyjavili hrubuju pracu z užyvańniem technałohij fotašopu i videamantažu, što śviedčyć ab vidavočna pravakacyjnym charaktary ​​padadzienaj infarmacyi», — padkreślili ŭ abaronnym viedamstvie.

Videa ź Ivianca:

nn.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH