Biełaruś nie budzie supracoŭničać ź Jeŭrasajuzam pa prahramach, raspracavanych u adnabakovym paradku. Ab hetym zajaviŭ siońnia žurnalistam pastajanny pradstaŭnik pry ES Andrej Jeŭdačenka.
«My nie budziem pracavać pa tych dakumientach Jeŭrasajuza, jakija jon raspracoŭvaje ŭ indyvidualnym paradku. My budziem pracavać tolki ŭ ramkach tych sumiesnych prahram, jakija budziem raspracoŭvać razam i ŭzhadniać z usimi zacikaŭlenymi», — cytuje Jeŭdačenka aficyjnaje ahienctva BiełTA.
Z nahody abvieščanaj prahramy «Jeŭrapiejski dyjałoh dla madernizacyi Biełarusi» Jeŭdačenka skazaŭ: «Heta ŭłasnaja prahrama Jeŭrapiejskaha sajuza, jak i ŭsie astatnija prahramy i prajekty, jakija jany raspracoŭvajuć u apošni čas u dačynieńni da dziaržaŭ Uschodniaha partniorstva, uklučajučy Biełaruś. Jeŭrasajuz syšoŭ ad ŭzhadnieńnia z nami niejkich paramietraŭ dakumientaŭ, jakija jany rychtujuć u dačynieńni da hetaj hrupy krain», — skazaŭ dypłamat.
Jeŭdačenka raskazaŭ, što ŭłady Biełarusi stavili dźvie ŭmovy.
«My ŭžo šmat razoŭ Jeŭrapiejskaj słužbie źniešnich dziejańniaŭ kazali, što my na takija varyjanty ŭzajemadziejańnia nie pojdziem», — padkreśliŭ pasoł.
Biełaruś paśladoŭna ŭchilajecca ad naładžvańnia adnosin ź Jeŭrasajuzam. Ekśpierty miarkujuć, što heta niajaŭnaja ŭmova ščodraj finansavaj padtrymki biełaruskaha režymu z Maskvy.