Roŭna dziesiać hadoŭ tamu, 31 sakavika 1997 hodu, žurnalist Alaksandar Stupnikaŭ sieŭ u ciahnik Miensk — Maskva i raźvitalna pamachaŭ rukoj. Maršrut byŭ zvykły, a dramatyzmu nadavała padziei adna akaličnaść: kiraŭnika biuro telekanała NTV departavali ź Biełarusi. Jamu zakinuli systematyčnuju dezynfarmacyju hramadzkaj dumki.
Heta stała vyprabavańniem admysłovaj "technalohii pracy" z pradstaŭnikami zamiežnych medyjaŭ, jakija dazvalali sabie padavać tutejšuju rečaisnaść biez ružovych farbaŭ.
Praź niekalki miesiacaŭ voźmucca za Paŭła Šaramieta, jaki ŭznačalvaŭ karpunkt ORT. Toj uvohule apyniecca za kratami, i samomu Jelcynu daviadziecca pakazać carski hnieŭ, kab žurnalista vypuścili.
Pradstaŭniku NTV nie pašancuje jašče raz: u 2003 hodzie Paŭła Sielina taksama departujuć. Nie spadabajecca, jak jon aśviatlaŭ pachavańnie Vasila Bykava.
Praz hod repartaž ab vuličnaj akcyi abierniecca vydvareńniem užo dla teležurnalista RTR Dźmitryja Piatrova. Jamu zakinuć, što zavysiŭ kolkaść udzielnikaŭ manifestacyi. To bok skaziŭ tradycyjny dla BT vobraz "nikčemnaj kupki"...
Nu a ŭžo tyja vypadki, kali zamiežnym žurnalistam (nia kažučy pra ajčynnych) bili tvary i kamery, navat pieraličyć ciažka. Apošni raz chto-kolviek dastaŭ ad doblesnych siłavikoŭ na niadaŭni Dzień Voli.
Pakazalny ž vypadak, kali letaś na pasiadžeńnie mienskaha samitu SND nie puścili karespandentaŭ "Moskovskoho komsomolca" dy "Kommiersanta". U vyniku, pamiatajecie, praktyčna ŭsie rasiejskija žurnalisty pakinuli mierapryjemstva na znak pratestu.
Naturalna, potym adstralalisia z asałodaj. Sam paradak dnia samitu adyšoŭ u cień, a temaj №1 staŭ, kažučy neŭtralna, styl stasunkaŭ aficyjnaha Miensku z presaj. Dy i nadalej sympatyj da biełaruskaha kiraŭnictva ŭ pakryŭdžanych maskoŭskich ŚMI nie dadałosia.
Nu i chto vyjhraŭ?
Taptać presu — heta zaŭždy nastupać na hrabli.
Naturalna, kožny ŭrad kłapocicca pra imidž. Ale ž praca z medyjami — cełaja navuka. U demakratyčnych krainach kiroŭnyja viarchi starajucca farmavać pryjaznaje staŭleńnie da svajoj palityki praz tonkija kamunikacyjnyja technalohii. Pryncypovy momant: tam u dziaržavy praktyčna niama paduładnaj presy, tamu i atrafavaŭsia chapalny refleks. U nas ža — jak u tym anekdocie ab praparščyku: što tut dumać — treści treba!
P.S. Stupnikaŭ raspaviadaje, što praz try hady paśla departacyi jamu daviałosia sustrecca ŭ Jerusalimie z aficyjnym kiraŭnikom Biełarusi. Toj spahadliva spytaŭsia: jak žonka, jak dzieci?..
