Pobač sa staražytnymi mohiłkami budujecca hihanckaja štab-kvatera Nacyjanalnaha alimpijskaha kamiteta.
Adrazu kala ŭvachoda stać štabieli razabranych aharodžaŭ.
Chutka na miescy starych nadmahillaŭ źjaviacca novyja.
Nadmahille novaha ŭzoru.
Siamiejny pomnik. Tut pachavanyja represavanyja ŭ 30-ja hady XX st, a taksama achviary Druhoj suśvietnaj vajny.
Niestandartnyja nadmahilli zachavalisia.
Mahiła ŭdzielnika hramadzianskaj vajny pačatku XX st.
Mnohich aburyła prysutnaść na starych mohiłkach techniki. Rabočyja tłumačać, što bieź jaje nijak.
Zarosłaja častka mohiłak, kudy jašče nie dajšli rabočyja.
Miaža pamiž dahledžanym i zapuščanym.
Praz kustoŭje prahladajecca hmach budučaj štab-kvatery.
Mohiłki «Krupcy» (Frunzienski rajon) pačali paradkavać 1 červienia. Kiraŭniki staličnaj kamunalnaj haspadarki kažuć, što pracy viaducca zhodna z daručeńniem Łukašenki.
Mohiłki lažać kala tak zvanaj prezidenckaj trasy.Litaralna za aharodžaj budujecca hihanckaja štab-kvatera Nacyjanalnaha alimpijskaha kamiteta. Praz darohu — zabaŭlalny kompleks kampanii «Trajpł».
Pracy viaducca z razmacham. Heta naściarožyła svajakoŭ pachavanych. Asabliva paśla taho, jak na terytoryju kładoŭ puścili techniku.
Na mohiłkach karespandenta «Našaj Nivy» sustreŭ mužčyna, jaki pry źjaŭleńni čałavieka z fotaaparatam adrazu ž adłučyŭsia ad hrupy rabočych. Jon nie nazvaŭsia, ale tut ža prapanavaŭ pravieści ekskursiju. Vyhladaŭ jon jak prarab abo majstar.
Pa jaho słovach, napružanaść sa svajakami pakrychu spadaje. «Spačatku ŭ ludziej było mała infarmacyi pra toje, što tut budzie rabicca» — paviedamiŭ mužčyna.
Dobraŭparadkavańniem zajmajucca niekalki arhanizacyj.Adna ź ich rasčyščaje terytoryju ad burjanu i kustoŭja, druhaja kładzie plitku i paradkuje razburanyja mahiły. Treciaja zajmajecca azielanieńniem.
Surazmoŭca pierakonvaŭ, što nivodnaje nadmahille nie zamieniać na novaje biez zhody svajakoŭ. «Kali niechta suprać, to jon piša zajavu, i my pakidajem usio — i mahiłu, i aharodžu vakoł jaje» — dadaŭ jon. U jakaści prykładu jon pakazvaje rukoj na akuratnaje pachavańnie, atočanaje mietaličnaj aharodžaj. Vakoł jaho niekalki naviutkich nadmahillaŭ, jakija pakłali na miescy razburanych pomnikaŭ.
Na siońniašni dzień mohiłki rasčyščanyja napałovu. Simvaličnaja miaža pamiž ačyščanaj terytoryjaj i zarosłaj kustoŭjem paznačanaja darožkaj ź plitki. «Lubaja takaja maštabnaja praca nie aby-dziecca biez techniki», — tłumačyć surazmoŭca. My akurat staim u kalainie ad śladoŭ, što pralehła siarod nadmahillaŭ.
U parosłaj travoj i bezam častcy mohiłak sustrakajecca śmiećcie, plaški ad śpirtnoha.«Prybirać treba. Bačycie, jak ździčeła tut usio. Takija zaraśniki pryciahvajuć nie samych lepšych ludziej», — kaža mužčyna. Ciažka nie pahadzicca. Pa darozie da mohiłak sustreŭ try kampanii kala kramy «Ramonak», jakija pili harełku ź pivam, zusim nie chavajučysia.
Pracy na Krupcoŭskich mohiłkach pavinny skončycca da kanca hoda.
* * *
Mohiłki «Krupcy» zasnavali ŭ 1876, začynili ŭ 1973. Tut pachavana kala 700 čałaviek, ahulnaja płošča składaje kala 1,16 ha.
U 1972 viosku Krupcy, na terytoryi jakoj mieścilisia mohiłki, dałučyli da Minska. A razam ź joj i pasiołak Pijanierski. Niaciažka zdahadacca, što mohiłki nazvali «Pijanierskimi». Sučasnuju nazvu mohiłki atrymali ŭ 2009.
