Hałoŭnaje ŭpraŭleńnie justycyi Haradzienskaha abłvykankamu admoviła ŭ rehistracyi Haradzienskaj abłasnoj arhanizacyy Partyi BNF.
Dakumenty na rehistracyju abłasnoj arhanizacyi Partyi BNF byli padadzienyja 28 traŭnia 2012 hodu. I ŭžo praź miesiac, 27 červienia, načalnik hałoŭnaha ŭpraŭleńnia justycyi Haradzienskaha abłvykankamu A.N. Siankievič paviedamiŭ ab prypynieńni pracedury rehistracyi Haradzienskaj abłasnoj arhanizacyi Partyi BNF na adzin miesiac. Padstavaj dla pryniaćcia takoha rašeńnia stałasia niepradastaŭleńnie śpisu siabraŭ Haradzienskaj haradzkoj arhanizacyi Partyi BNF, z ukazańniem miescaŭ ich pracy i žycharstva.
Haradzienskaj abłasnoj struktury Partyi BNF byŭ dadzieny čas ciaham miesiaca vypravić sytuacyju — dasłać śpis siabroŭ Haradzienskaj haradzkoj arhanizacyi Partyi, što i było zroblena Vadzimam Sarančukovym, staršyniom struktury. Patrebnyja dakumenty byli dasłanyja zamoŭlenym listom, ab čym jość kvitancyja.
Adnak Hałoŭnaje ŭpraŭleńnie justycyi Haradzienskaha abłvykankamu spasyłajecca na adsutnaść dakumentaŭ, pa toj pryčynie Haradzienskaj abłasnoj arhanizacyi i było admoŭlena ŭ dziaržaŭnaj rehistracyi.
Staršynia Haradzienskaj abłasnoj arhanizacyi Partyi BNF Vadzim Sarančukoŭ zajaviŭ, što admova ŭ dziaržaŭnaj rehistracyi struktury niepasredna źviazanaja z vybarčaj kampanijaj 2012 hodu, bo mienavita abłasnyja struktury palityčnych partyjaŭ majuć prava vyłučać svaich pradstaŭnikoŭ u skład učastkovych vybarčych kamisijaŭ. Tamu rašeńnie adnosna rehistracyi Haradzienskaj abłasnoj arhanizacyi Partyi BNF z boku ŭładaŭ jość vyklučna palityčnym. Sp. Sarančukoŭ taksama zaznačyŭ, što Partyja BNF budzie abskardžvać u sudzie rašeńnie ŭpraŭleńnia justycyi Haradzienskaha abłvykankamu.
Nahadajem, što haradzienskaje adździaleńnie Partyi BNF nieadnarazova rabiła sproby atrymać rehistracyju, sutykajučysia z sumnieŭnymi i nieabhruntavanymi adkazami. U pryvatnaści, 3 hady tamu Haradzienskaj abłasnoj arhanizacyi Partyi BNF było admoŭlena ŭ rehistracyi z pryčyny taho, što šryft u pratakole byŭ 12 pamieru, a nie 14. Na dadzieny momant 10 z 15-ci zarehistravanych u Biełarusi palityčnych partyjaŭ majuć na Haradzienščynie svaje arhanizacyjnyja struktury.
Pres-słužba Partyi BNF
