Staršynia Palitrady Abjadnanych demakratyčnych sił Biełarusi Alaksandr Milinkievič źviarnuŭsia ŭ JUNIESKA z prośbaj nie dapuścić źniščeńnia historyka-architekturnych pomnikaŭ Hrodna. Pra heta BiełaPAN paviedamiŭ pres-sakratar palityka Pavieł Mažejka.
«Zychodziačy z pryniatych Biełaruśsiu pravavych abaviazkaŭ u halinie achovy historyka-kulturnaj spadčyny jak intehralnaj častki sumiesnaj jeŭrapiejskaj spadčyny <...> ja źviartajusia da suśvietnaj i jeŭrapiejskaj hramadskaści z prośbaj terminova źviarnuć uvahu na fakty chutkich tempaŭ źniščeńnia histaryčnaj architekturna-archieałahičnaj tkaniny Hrodna», — havorycca ŭ liście A.Milinkieviča.
Jak paviedamiŭ P.Mažejka, na hetu prablemu palityk źviarnuŭ uvahu jašče zadoŭha da svajho lista. «Prosta raniej spadziavalisia na toje, što rekanstrukcyja histaryčnaha centra Hrodna budzie vieścisia zhodna ź mižnarodnymi abaviazacielstvami i ŭ adpaviednaści z zakonami ab achovie historyka-kulturnaj spadčyny. Tym nie mienš, pieramovy nieabyjakavych hramadzian z kiraŭnictvam abłasnoha centra vynikaŭ nie dali, u suviazi z čym histaryčny centr Hrodna moža być całkam źniščany. Raniej my nie chacieli palityzavać hetuju prablemu, pryciahvać da jaje ŭvahu apazicyi, suśvietnaj supolnaści. Ale ciapier inšaha vyjścia prosta nie zastałosia», — zaznačyŭ P.Mažejka.
Jak skazaŭ pres-sakratar palityka, u Alaksandra Milinkieviča jašče z toj pary, jak jon byŭ vice-meram Hrodna, zachavalisia dobryja kantakty ŭ JUNIESKA. «Pry im byŭ uchvaleny prajekt restaŭracyi Kałožskaj carkvy. Finansavać restaŭracyju jakraz brałasia JUNIESKA. Tamu my raźličvajem na toje, što naša inicyjatyva budzie padtrymanaja», — skazaŭ P.Mažejka.
