Apošnim časam da ŭsich viadomych śvietu revalucyj dadałasia jašče adna: revalucyja Pussy Riot. Nu, moža, paŭtary, kali ŭzhadać Femen. Niechta, mahčyma, dadaść jašče seksualnuju revalucyju. Ale biez seksualnaj revalucyi nie abychodziłasia anivodnaja inšaja. Bolš za toje: mienavita seksualnyja revalucyi stvarali kali nie hlebu dla sacyjalnych revalucyj, to ich pałki duch i samaachviarny pakutlivy vobraz. Dastatkova nahadać znakamituju karcinu Dełakrua «Svaboda na barykadach»...
Jość sens paraŭnać toj vobraz Svabody z vobrazam Pussy Riot albo Femen, kab pierakanacca ŭ tym, što sučasnyja revalucyi śpiejuć, da prykładu, nie na žabrackich sialanskich paletkach, a ŭ bardelach, nie ŭ hałovach i sercach, a ŭ miescy, ścipła prychavanym za inšaziemnym terminam «pussy»...
Ja, viadoma, ryzykuju naklikać na siabie hnieŭ abaroncaŭ pank-hurtu, kali vykažu dumku z tych, ad jakich, pa vyrazie adnoj z čytačak «NN», «patychaje sumnaj saŭkovaściu». Ale vykažu: u luboha narmalnaha, padkreślivaju, narmalnaha, nie tolki vierujučaha čałavieka tak zvanaja pratestnaja akcyja Pussy Riot vyklikaje pačućcio miarzotnaści, pra jakoje čamuści nie pryniata havaryć usłych. Nie mienšaje za pačućcio miarzotnaści, jakoje vyklikaje rasprava ŭłady nad maładymi žančynami.
Adna sprava — Pussy Riot, inšaja — maładyja žančyny, niekatoryja ź dziećmi. I mahutnaja, u poŭnym abmundziravańni, ułada, jakaja pad vyhladam abarony zakonnaści i paradku demanstruje pierad usim śvietam svaju prahu drobnaj pomsty.
Zdajecca, ja viedaju, adkul heta praha: ad pryŭłaščanaj manapolii na amaralnaść, maŭlaŭ, tolki ja, ułada, maju prava na bieskulturnaść, chłuśniu, cynizm i duchoŭnaje ciemrašalstva.
Čamu, adkažycie, možna hramychać tankami na mohiłkach pad nazvaj Krasnaja płošča i nielha vyčvaracca ŭ carkvie?!
Čamu, adkažycie, možna ŭsłych abražać nie tolki kiraŭnikoŭ tych ci inšych krain, ale i sami krainy nakštałt «kazioł» albo «mała nie padasca», i nielha źviartacca da Baharodzicy ad imia pussy?!
Čamu, adkažycie, možna karystacca dvuduššam carkoŭnych ijerarchaŭ, kab nie zhubić uładu, i nielha karystacca ambonam, kab hetu ŭładu adasłać kudy padalej?!
Čamu «dazvalajecca ŭsio» ŭładzie i nie «dazvalajecca ŭsio» pryvatnym asobam, asabliva kali jany abjadnoŭvajucca ci to ŭ apazicyjnyja partyi, ci to ŭ hramadskija niaŭradavyja arhanizacyi, ci to ŭ pank¬hurty?
Ale amaralnaść ułady nie pavinna apraŭdvać amaralnaść pryvatnych asob.
Padsudnyja z Pussy Riot nastojvali na tym, što jany ździejśnili nie chulihanskuju, a palityčnuju akcyju, chacia dapuścili «etyčnuju pamyłku». Ale «etyčna pamyłkovyja», amaralnyja ŭčynki jak srodki palityčnaha pratestu tolki sadziejničajuć umacavańniu amaralnaj ułady, pakidajučy hramadstvu adziny srodak jaje źmieny — kryvavy i biaźlitasny Riot. U pierakładzie — bunt. Biaskryŭdny, pa sutnaści, dla ŭłady Riot «dzievačak», maŭlaŭ, usiaho tolki šou, nasamreč adlustroŭvaje hetu tendencyju, pa-sučasnamu havoračy, trend.
Miž tym, źmieny aŭtarytarnych režymaŭ na demakratyčnyja vyśpiavajuć pastupova i adbyvajucca pad ciskam hramadstva, jakoje jadnajecca pa pryncypach vysokaj marali. Brytanskaja Indyja i Machatma Handzi, Čechasłavakija i Vacłaŭ Havał, Saviecki Sajuz i Andrej Sacharaŭ...
Kali padobnyja źmieny ŭ rešcie rešt adbuducca ŭ Biełarusi, to pobač z paŭstanie imia Vasila Bykava...
Ja pišu hetyja natatki 25 žniŭnia, dzień u dzień praz 44 hady paśla sapraŭdy mužnaha ŭčynku siami dysidentaŭ, jakija razharnuli na Łobnym miescy płakaty suprać uvodu savieckich vojskaŭ u Čechasłavakiju. Ich žorstka źbili, kinuli ŭ turmy i psichlakarni, ale ich upłyŭ na hramadstva, ich mužnaść, na toj čas u adzinocie, ich maralnaja pieravaha nad Kramlom mieli chaj sabie addalenyja, ale niepieraadolnyja palityčnyja nastupstvy.
Ja nie viedaju, jak nazyvać Łobnaje miesca paśla taho, jak na im, nie tolki ŭ sabory, varjacieli pussy…Ale nastupstvy vidavočnyja: z adnaho boku vandalizm u jakaści demanstracyjnaj salidarnaści dy niebiaśpiečny zaklik stvarać družyny ŭ abaronu pravasłaŭnych simvałaŭ i śviatyń, ź inšaha — sumnieŭ u maralnaści libieralnaj apazicyi pucinskamu režymu. A moža, śpilenyja ź ciažkoj ruki Femen kryžy ŭ roznych miescach Rasii — supraciŭ ciemrašalstvu i sučasnamu klerykalizmu? Nie, nie baču roźnicy pamiž vandałami z Femen i vandałami na mohiłkach Kurapat...
Ale jość nastupstvy i małavidavočnyja.
Pasijanaryja ŭ pierakładzie ź ispanskaj — pałkaja žančyna.
Pasijanarnaść — uvohule palityčny sinonim pałkaj revalucyjnaści. Pry ŭsim zachapleńni jaje prykładami mienavita jana davodzić u rešcie rešt da hułahaŭ i rujnavańnia chramaŭ.Navat kali chavaje tvar i vystaŭlaje napakaz pussy...
Nie, usio ž nie ŭsio dazvalajecca.
Nie ŭsio.
