25 krasavika BRSM ładzić akcyju «Čarnobylski šlach» u Iviency (Vałožynščyna).
Padčas akcyi na centralnaj płoščy Ivienca projdzie kancert biełaruskich zorak estrady. Na hetaj imprezie buduć prysutničać dzieci z zabrudžanych radyjacyjaj rehijonaŭ krainy. Heta budzie nie adzinaje mierapryjemstva, zładžanaje ŭ ramkach akcyi BRSM «Čarnobylski šlach — daroha žyćcia», patłumačyła nam supracoŭnica sajuzu Kaciaryna Dalidovič, adkaznaja za praviadzieńnie akcyi. Jašče adno mierapryjemstva projdzie 12 krasavika ŭ kurortnym pasiołku Ždanovičy pad Mienskam.
Takija akcyi arhanizacyja ładziła i minułyja hady, ale sioleta jana najbolš reklamujecca. Roliki pra BRSMaŭskuju prahramu «Čarnobylski šlach» aktyŭna pakazvajuć na biełaruskich telekanałach.
Ułady praciahvajuć hulać na poli, dzie tradycyjna mocnaja apazycyja. 25 sakavika byŭ zładžany kancert «Za niezaležnuju Biełaruś», ciapier — novaja akcyja. Adznačać «Čarnobylski šlach» 26 krasavika ŭ stalicy BRSM pakul nie planuje.
Varta adznačyć, što ŭ 1986 hodzie Ivieniec trapiŭ u nalibacka-iviejskuju radyjacyjnuju plamu. Na pačatku 90-ch uzrovień zabrudžvańnia tutaka składaŭ 1,5 kiury na kv. km. Ciapier, paśla taho jak adbyŭsia paŭraspad radyjeaktyŭnaha ceziju, zabrudžvańnie źniziłasia. Tym nia mienš, miascovaje nasielnictva narakaje na rezki rost ankalahičnych zachvorvańniaŭ, jak i ŭ inšych zabrudžanych rehijonach. Nijakich prafilaktyčnych zachadaŭ na Vałožynščynie nie pravodzicca.
Adnak vybar Ivienca ŭ jakaści placoŭki dla kancertu BRSM, mahčyma, tłumačycca nie radyjacyjaj, a inšymi akaličnaściami. U Iviency adznačajecca aktyŭnaść patryjatyčnaje moładzi. Napiaredadni Dnia Voli vałožanskaje KDB ažyćciaviła šerah vobšukaŭ školnikaŭ, pra što ŭ "NN" pisali ŭdzielniki padziejaŭ. Nia vyklučana, što i BRSM abaviazali zarhanizavać "kontraprapahandysckija imprezy" mienavita ŭ hetym cichim malaŭničym miastečku z słaŭnaj historyjaj.
