Buduć sudzić homielskaha fanata, jaki źbiŭ zaŭziatara ź Minska

Śledčym upraŭleńniem USK pa Homielskaj vobłaści zavieršana rasśledavańnie spravy ŭ dačynieńni da 20-hadovaha žychara abłasnoha centra, jaki abvinavačvajecca va ŭčynieńni złačynstvaŭ, praduhledžanych č. 2 art. 147 (naŭmysnaje pryčynieńnie ciažkaha cialesnaha paškodžańnia z chulihanskich mierkavańniaŭ) i č. 1 art. 206 (rabavańnie) Kryminalnaha kodeksa.

Jak paviedamiła aficyjny pradstaŭnik upraŭleńnia Śledčaha kamiteta pa Homielskaj vobłaści Maryja Kryvanohava, 25 sakavika ŭ Homieli abvinavačvany z chulihanskich mierkavańniaŭ naŭmysna nanios 21-hadovamu žycharu Minska dva ŭdary kułakom u tvar i sarvaŭ ź jaho šyi šalik ź simvolikaj futbolnaha kłuba «Dynama» (Brest). Zatym jon źbiŭ minčanina z noh i nanios jamu nie mienš čym dva ŭdary nahoj pa hałavie. Zhodna z zaklučeńniem ekśpiertyzy, paciarpiełamu byli pryčynienyja ciažkija cialesnyja paškodžańni ŭ vyhladzie pierałomu kaściej zvodu čerapa, krovaźlićcia ŭ vobłaści pravaj skronievaj doli. Paśla hetaha hamialčanin vykraŭ raniej sarvany šalik i źbieh.

Pavodle słoŭ abvinavačvanaha, jon źjaŭlajecca futbolnym zaŭziatara i šalik ź simvolikaj kamandy-sapiernicy zabraŭ u jakaści trafieja.

Kryminalnaja sprava pieradadziena prakuroru dla nakiravańnia ŭ sud. Padčas rasśledavańnia było ŭstanoŭlena, što troje žycharoŭ Homiela, jakija znachodzilisia ŭ adnoj kampanii z abvinavačvanym, z chulihanskich mierkavańniaŭ nanieśli paboi žycharu Barysava 1990 hoda naradžeńnia. Kryminalny pieraśled u dačynieńni da ich spynieny ŭ suviazi z uvachodžańniem u siłu zakona ab amnistyi. Jany pastaŭlenyja na prafiłaktyčny ŭlik u RAUS pa miescy žycharstva.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH