Na pieradvybarnym pikiecie, arhanizavanym kampanijaj «Havary praŭdu!» 13 vieraśnia ŭ Minsku, vybarščykaŭ zaklikali dapamahčy adšukać dziejnych deputataŭ pałaty pradstaŭnikoŭ.
Prachožym, u pryvatnaści, prapanoŭvałasia siarod 110 fatahrafij deputataŭ nižniaj pałaty parłamienta adšukać taho, chto byŭ abrany ŭ ich akruzie na parłamienckich vybarach 2008 hoda.
Aktyvist «Havary praŭdu!» Michaił Paškievič praź miehafon abjaŭlaŭ ab prapažy deputata, jakoha čatyry hady tamu bačyli ŭ akruzie, adnak bolš tam jon nie pajaŭlaŭsia.«Za hadzinu, na praciahu jakoj my pravodzili akcyju, usiaho čałaviek piać zmahli nazvać proźvišča svajho deputata», — paviedamiŭ jon.
Paškievič nahadaŭ, što staršynia Centrvybarkama Lidzija Jarmošyna havaryła ab nieprymietnaj vybarčaj kampanii. «Ale reč nie tolki ŭ tym, što kampanija prachodzić małaprymietna, ludzi ŭ našaj krainie nie viedajuć navat dziejnych deputataŭ. Značyć, jašče čatyry hady tamu ludzi nie chadzili na vybary», — zaznačyŭ jon.
Aktyvist miarkuje, što siońniašni pikiet moža być «lepšym testam dla ŭładaŭ na ich papularnaść i zapatrabavanaść u naroda».«Ludzi ŭ tvar deputataŭ nie viedajuć. Jany viedajuć Łukašenku, Jarmošynu, Łazavika i bolš nikoha. Kali b na telebačańni Jarmošynu pakazvali chacia b u dva razy mienš i davali hety efirny čas kandydatam u deputaty, tady b i ahitacyjnaja kampanija prachodziła bolš prymietna», — skazaŭ jon.
Kandydat u deputaty pa Kalvaryjskaj vybarčaj akruzie № 104 Taćciana Karatkievič ličyć abranuju formu praviadzieńnia pikieta «vielmi pryvablivaj». «Jana vyklikaje vybarščykaŭ na razmovu, dazvalaje im spakojna vykazać svajo mierkavańnie», — zajaviła jana BiełaPAN.
A vy viedajecie, chto vaš deputat z 2008 hoda?