Miaśnikovič: «Pakul praryŭnych prajektaŭ i idej u krainie vielmi mała» 5

Prem'jer-ministr Biełarusi Michaił Miaśnikovič zapatrabavaŭ nakiroŭvać srodki ŭ chodzie madernizacyi ŭ efiektyŭnyja prajekty. Adpaviednuju zadaču jon ahučyŭ siońnia na pasiadžeńni Prezidyuma Saŭmina, dzie razhladalisia vyniki inviestycyjnaj dziejnaści za studzień-lipień 2012 hoda i zadačy na astatni pieryjad hoda.

Pakul praryŭnych prajektaŭ i idej u krainie vielmi mała, padkreśliŭ, kiraŭnik urada.

Adnak popyt na ich ciapier vielmi vysoki. Michaił Miaśnikovič zapatrabavaŭ invieściravać srodki, najpierš, u realizacyju takich prajektaŭ. «Kali madernizacyja źviadziecca da taho, što navat u nieefiektyŭnyja i bieśpierśpiektyŭnyja pradpryjemstvy znoŭ ža ŭkładvać hrošy, nieviadoma, što my atrymajem. Heta nie madernizacyja, a marnatraŭstva, takoha być nie pavinna, — zajaviŭ jon. — Tamu treba ŭ pieršuju čarhu ŭkładvać srodki ŭ vytvorčaści, jakija buduć efiektyŭnymi i zaŭtra, i praz 10 hadoŭ». U hetaj situacyi prem'jer-ministr stanoŭča acaniŭ rabotu niekatorych bankaŭ, jakija ažyćciaŭlajuć detalovuju acenku prajektna-kaštarysnaj dakumientacyi i pravodziać niezaležnuju ekśpiertyzu biźnies-płanaŭ.

«Kali my nie zabiaśpiečym madernizacyju pradpryjemstvaŭ, kali nie źmienim padychody pa struktury ekanomiki, to zrazumieła, što vychodzić na pakazčyki 2013 hoda i piacihodki budzie vielmi składana,

— dadaŭ Michaił Miaśnikovič. — U asnovie ŭsich hetych pracesaŭ inviestycyjnaja dziejnaść». Mienavita na heta źviarnuŭ uvahu i kiraŭnik dziaržavy na naradzie 11 vieraśnia.

Razam z tym, šerah ministerstvaŭ i abłvykankamaŭ nie vykanali zapłanavanyja pakazčyki.

Prem'jer-ministr paprasiŭ dać tłumačeńni, nazvać pryčyny. «Spasyłacca na toje, što nie chapiła abo niedastatkova biudžetnych ci kredytnych resursaŭ, heta nie zusim abjektyŭna, — padkreśliŭ jon. — Kali darahija rublovyja kredyty, u nas dastatkova zamiežnych kredytnych linij ź nievysokaj pracentnaj staŭkaj».

Jak paviedamiŭ ministr ekanomiki Mikałaj Snapkoŭ, pačynajučy z 2002 hoda ŭ Biełarusi naziralisia vysokija tempy inviestycyj u asnoŭny kapitał. Kali za 2001–2005 hady ŭ ekanomiku ŭkładziena $20 młrd., užo ŭ nastupnaj piacihodcy (2006–2010) — u try z pałavinaj razy bolš, a heta bolš za $70 młrd. U 2011 hodzie hety abjom srodkaŭ dasiahnuŭ $21,3 młrd. Dola inviestycyj u asnoŭny kapitał u VUP jak asnoŭny pakazčyk rasšyranaha ŭznaŭleńnia i indykatar nacyjanalnaj biaśpieki ŭ minułym hodzie skłaŭ rekordnyja 36%.

U studzieni-žniŭni hetaha hoda ŭzmacnieńnie hrašova-kredytnaj i biudžetna-padatkovaj palityki, peŭnaje skaračeńnie kredytavańnia dziaržprahram akazali strymalny ŭpłyŭ na raźvićcio inviestycyjnaj śfiery, kanstatavaŭ Mikałaj Snapkoŭ.

Za nazvany pieryjad u ekanomiku krainy ŭkładziena Br85,8 trłn. inviestycyj u asnoŭny kapitał. Temp rostu skłaŭ 84,1 pracenta da ŭzroŭniu studzienia-žniŭnia 2011 hoda. Pa vynikach hoda temp rostu čakajecca na ŭzroŭni 91 pracenta. Pry hetym dola inviestycyj u asnoŭny kapitał u VUP składzie 29,5 pracenta, što na 1,5 pracenta vyšej, čym siaredniaje značeńnie za apošnija vosiem hadoŭ.

Analizujučy dynamiku inviestycyjnaj aktyŭnaści, ministr adznačyŭ, što arhanizacyi respublikanskaha i kamunalnaha padparadkavańnia nie zmahli znajści dastatkovaha abjomu źniešnich resursaŭ dla raźvićcia i vykanańnia inviestycyjnych płanaŭ. Adnoj z asnoŭnych krynic finansavańnia inviestycyj zastajucca biudžetnyja srodki. Razam z tym, arhanizacyi pryvatnaha siektara zmahli ŭ bolšaj stupieni saryjentavacca na źniešnija krynicy raźvićcia.

BiełTA

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH