Na pytańnie, ci paŭpłyvała na atmaśfieru vybaraŭ toje, što za kratami zastajucca kandydat u prezidenty Mikoła Statkievič i inšyja palitviaźni, staršynia CVK Lidzija Jarmošyna siońnia skazała.
«Usio zaležyć ad taho, jak vy aceńvajecie atmaśfieru. Kali vy žyviacie ŭ hetaj tusoŭcy, u hetym asiarodździ, dzie asoby, jakija znachodziacca ŭ miescach pazbaŭleńnia voli, usprymajucca jak siabry, to heta, vidać, na vas paŭpłyvała, na vaša asiarodździe.
Dla astatnich, jakija naŭrad ci pamiatajuć hetyja imiony, — ja, darečy, sama viedaju tolki Mikołu Statkieviča, nikoha nie viedaju, moža, jašče niechta z byłych kandydataŭ, to nijak nie paŭpłyvała», — zajaviła Jarmošyna.
«Što da palitviaźniaŭ, to ja vykazała svaju pazicyju adnaznačna i ŭčora ABSIE, i raniej pradstaŭniku pasolstva Niderłandaŭ, jaki nas naviedaŭ pazaŭčora: u Biełarusi niama nijakich palitviaźniaŭ.
Palitviazień — heta čałaviek, jaki znachodzicca ŭ miescach pazbaŭleńnia voli za svaje pierakanańni.
Hetyja hramadzianie znachodziacca ŭ miescach pazbaŭleńnia voli za ŭčynienyja dziejańni, jakija parušali hramadski paradak i pahražali žyćciu i zdaroŭju supracoŭnikaŭ aparatu CVK, jakija znachodzilisia tut.
Ja ŭžo nie kažu pra paškodžańnie majomaści. Jany ŭčynili złačynstvy, za jakija ŭčora ŭ Madrydzie ich sustreli humovymi kulami. Dakładna takich ža, i nijakaja suśvietnaja supolnaść nie cikavicca, a za što ž tak žorstka?
U nas śpiecsrodki nie prymianialisia. Tamu zusim łahična ludzi niasuć adkaznaść za ŭčynienyja imi złačynstvy.
Tamu ŭsie hetyja matyvy, razmovy pra asobaŭ, jakija znachodziacca ŭ miescach pazbaŭleńnia voli, — heta tema, jakaja štučna naviazvajecca mižnarodnym naziralnikam i ničoha nie maje ahulnaha z toj rečaisnaściu, jakoj supravadžalisia i padziei ŭ śniežni, i padziei, jakija adbylisia ciapier», — zajaviła staršynia CVK Lidzija Jarmošyna.
Staršynia CVK Lidzija Jarmošyna taksama zajaviła, što maje namier pravodzić vybarčyja kampanii ŭ Biełarusi da 2016 hoda: «Termin maich paŭnamoctvaŭ zakančvajecca ŭ śniežni 2016 hoda. Tamu, kali mnie nie paviazie, daviadziecca jašče pravodzić nastupnyja parlamenckija vybary. Prezydenckija samo saboj. Nastupnyja parlamenckija — vosieńniu 2016 hoda».
