1.
ty idzieš u hryby
ty idzieš pa hryby
ty idzieš za hrybami
praz tuman u łahčavinie
i ŭzychodziačaje sonca nad lesam
jak hryb jaki tabie śniŭsia
u dalokim dziacinstvie
dzie ŭsie drevy i hryby
byli vialikimi
2.
hryby- heta pryhažość
jakaja ŭ čas hrybnoha nadvorja
promniami sonca
vyciskajecca ź ziamli
jak zubnaja pasta ź ciubika
3.
lasy-heta hrybnyja kniastvy
u jakija my
niby tatara-manhoły
robim nabiehi
i vyrazajem usich
i maładych i starych
a hryby paśla nas
znoŭ vyrastajuć
i nas nie bajacca
bo prydzie čas
i my staniem starymi
nibyta hryby
jakija lubić źbirać
i źbiraje śmierć
4.
niama daždžoŭ-niama hryboŭ
i tolki muchamory
jak začaravanyja čyrvonyja šapački
što nieśli svaim babulam piražki
sustrakajucca ŭ ciabie na šlachu
i ty spyniaješsia kala ich
jak hałodny voŭk
5.
ty chodziš pa lesie
u pošukach hryboŭ
jak u pošukach minułych dzion
kali ty byŭ małady i bahaty
i ciabie šukali žančyny
jak ty ciapier šukaješ hryby
6.
hryby na bałotach
siarod kamaroŭ i žabaŭ
nibyta vysłanyja ź lasoŭ
za toje što nie zdymali šapak
pierad Lesavikom
7.
niekatoryja hryby
vielmi seksualnyja
ale jany seksam nie zajmajucca
bo bajučysia abrazańnia
i chavajučysia ad ludziej z nažami
traciać svaju seksualnaść
pamirajuć nie spaznaŭšy
ni seksu ni abrazańnia
8.
lisički-heta hrybnoje zołata
stvoranaje ałchimikami Lesavikami
i my źbirajem hrybnoje zołata
i radujemsia jak dzieci
svajmu sabranamu bahaćciu
chodziačy pa hrybnicach
jak pa Mlečnych šlachach
9.
vosieńniu staryja pni
kučaraviacca apieńkami
jakija jak maleniačkija talerki-anteny
łoviać soniečnyja promni
i pavučki lasnyja
ich uplatajuć u svaje pavuciny
jak u biełyja vieršy
ale nie ŭsie my viedajem pra heta
zryvajučy ź pnioŭ apieńki
jak staraśvieckija paryki
10.
kali nie było čaho jeści
ludzi źbirali hryby
i ratavalisia imi ad hoładu
a jon jeŭ muchamory
kab pakinuć hety śviet
jaki padobny na hryb
pad jakim zaŭsiody
niekamu nie chapaje miesca
kab žyć i nie dumać
pra hryby jakija možna jeści
kab pazbavicca hoładu
11.
ty viartaješsia z hryboŭ
praz tuman u łahčavinie
u jakoj bačycca rodnaja chata
jak śviatło ŭ kancy tunela
i sonca jakoje ŭzyjšło nad lesam
jak załaty koš z hrybami
jaki napoŭnili vaviorki
pračnuŭšysia raniej za ciabie
kali ty išoŭ u hryby
kali ty išoŭ pa hryby
kali ty išoŭ za hrybami
1-3.10.2012.