Nabyŭ moc pryhavor, vyniesieny ŭ dačynieńni da19-hadovaj žycharki Pinska za zabojstva novanarodžanaj dački.
Jak paviedamiła načalnik adździeła prakuratury Bresckaj vobłaści Natalla Vasiarčuk, 10 studzienia pinčanka naradziła ŭ kvatery pa miescy žycharstva žyvuju dziaŭčynku, zatym zadušyła, zaviazaŭšy na šyi piatlu z survetki, i adniesła miortvuju dačku na bałkon. 13 studzienia jana vykinuła cieła ŭ śmiećciepravod, jakoje znajšła prybiralščyca ŽES.
28 žniŭnia sud Pinskaha rajona i horada Pinska pryznaŭ maci vinavataj u zabojstvie novanarodžanaha dziciaci paśla rodaŭ, učynienym va ŭmovach psichatraŭmujučaj situacyi, vyklikanaj rodami (art. 140 KK), i pryhavaryŭ da 3 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach ahulnaha režymu.
Na padstavie art. 8 zakona «Ab amnistyi niekatorych katehoryj asob, jakija ŭčynili złačynstvy» termin pakarańnia ŭ vyhladzie pazbaŭleńnia voli skaročany na adzin hod.
U sudovym pasiadžeńni było ŭstanoŭlena, što niezamužniaja pinčanka utojvała ad svajakoŭ ciažarnaść, da miedykaŭ nie źviartałasia.
Abvinavačanaja i advakat abskardzili pryhavor, paličyŭšy, što sud nie ŭličyŭ jaje ščyraha raskajańnia va ŭčynieńni złačynstva, i prasili pryznačyć pakarańnie ŭ vyhladzie abmiežavańnia voli biez nakiravańnia ŭ papraŭčuju ŭstanovu adkrytaha typu.
12 kastryčnika sudovaja kalehija pa kryminalnych spravach Bresckaha abłasnoha suda, razhledzieŭšy skarhi, źmianiła pryhavor suda pieršaj instancyi, pryznačyŭšy abvinavačanaj 5 hadoŭ abmiežavańnia voli biez nakiravańnia ŭ papraŭčuju ŭstanovu adkrytaha typu.
Na padstavie art. 8 zakona «Ab amnistyi» hety termin skaročany da 4 hadoŭ.
Asudžanaja — studentka adnoj z VNU krainy, raniej nie sudzimaja. Z 16 studzienia ŭtrymlivałasia pad vartaj.
