Abvieščany konkurs na 2-ju Litaraturnuju premiju imia Ježy Hiedrojca

Pasolstva Respubliki Polšča ŭ Biełarusi, Polski Instytut u Minsku, Biełaruski PEN-Centr i Sajuz biełaruskich piśmieńnikaŭ druhi raz abviaščajuć Litaraturnuju premiju imia Ježy Hiedrojca za najlepšuju knihu prozy, jakaja vyjšła ŭ 2012 hodzie na biełaruskaj movie.

Mety premii:

— ušanavać pamiać Ježy Hiedrojca, publicysta, palityka, zasnavalnika i redaktara paryžskaha hramadska-palityčnaha časopisa «Kultura»;

— paspryjać pahłybleńniu polska-biełaruskich stasunkaŭ u halinie kultury;

— papularyzavać sučasnuju biełaruskuju litaraturu ŭ Biełarusi i Polščy

— padtrymać aktualnych biełaruskich piśmieńnikaŭ, paspryjać vychadu ich tvorčaści na mižnarodny ŭzrovień.

Umovy premii

Litaraturnaja premija Hiedrojca prysudžajecca za najlepšuju knihu, jakaja była vydadzienaja (u papiarovym abo elektronnym varyjantach) u 2012 hodzie na biełaruskaj movie ŭ žanrach «mastackaja proza», «eseistyka» (žury premii pakidaje za saboj prava vyznačać žanr tvoraŭ u sprečnych vypadkach).

Naminavańnie projdzie ŭ try etapy.

Napačatku 2013 h. budzie abvieščany łonh-list premii (12 pazicyj). Na pačatku lutaha budzie abvieščany šort-list premii (6 pazicyj). Abviaščeńnie i ŭšanavańnie pieramožcy (-aŭ) adbudziecca 3 sakavika 2013 h., u Mižnarodny dzień piśmieńnika. Siarod uznaharodaŭ — mahčymaść vydać knihu ŭ Polščy, litaraturnyja stypiendyi i zaprašeńni ŭ jeŭrapiejskija damy tvorčaści.

Prava prapanoŭvać knihi dla ŭklučeńnia ŭ łonh-list premii majuć: siabry žury, dyrektary vydaviectvaŭ, kiraŭniki tvorčych supołak i piśmieńnickich arhanizacyjaŭ, łaŭreaty premii papiarednich hadoŭ. Dla naminacyi knihi na premiju nieabchodna dasłać abo pieradać u siadzibu Biełaruskaha PEN-Centra padpisanuju zajaŭku ŭ advolnaj formie, dałučyŭšy da jaje 5 asobnikaŭ naminavanaj knihi.

Skład biełaruska-polskaha žury budzie abvieščany ŭ pačatku listapada.