Vialiki kancert hurtu «Pałac» u Respublikanskim teatry biełaruskaj dramaturhii z nahody 20-hodździa niečakana admienieny.
Arhanizatary vymušanyja viartać hledačam hrošy za kvitki, jakija byli razabranyja jašče za dva tydni da pačatku dziei.
Muzykanty hurtu «Pałac», jakija rychtavali da kancertu 26 kastryčnika admysłovuju prahramu «Pieśni lubovi i mudraści», vyhladajuć razhublenymi. Dla ich hety vystup byŭ vielmi važnym.Pa-pieršaje, jon pryśviečany 20-hodździu hurtu, a tamu zaprašeńni na jaho atrymali tyja, chto tak ci inakš spryčyniŭsia da historyi kamandy. Pa-druhoje,
«pałacaŭcy» rychtavalisia pradstavić u hety dzień adrazu dva novyja relizy – muzyčnuju prypavieść «Sałdat-doktar» i śviežy studyjny albom «Koła hrukatała».
Aficyjnaj pryčynaj nazyvajecca toje, što «pa abstavinach, niezaležnych ad administracyi teatra i muzykantaŭ hurtu «Pałac», paŭstali arhanizacyjnyja prablemy, u vyniku jakich praviadzieńnie mierapryjemstva stała niemahčymym».Anijakaj bolš kankretyki nie paviedamlajecca. Adzinaje, što zmahła zrabić administracyja teatra, dyk heta paprasić u hledačoŭ prabačeńnia. Lidar hurtu Aleh Chamienka zaznačyŭ partału Tuzin.fm:
«Ja i maje paplečniki ničoha kamentavać nie chočam i nam niama za što prynosić prabačeńni. Pakiniem hetu situacyju biez kamientaroŭ».
Tyja, chto nabyŭ kvitki na kancert «Pałaca», mohuć viarnuć hrošy za ich u kasach Teatra biełaruskaj dramaturhii. Telefon kasy: +375 29 385-97-51.
* * *
Absurdny zahałovak, absurdnaja navina… Jak takoje mahčyma, kab adny z samych jaskravych pradstaŭnikoŭ sučasnaj biełaruskaj kultury stali kostkaj u horle ludziam, adkaznym pa pracy niby za roskvit krainy.
Možna tolki ŭjavić, jak napužała administracyju teatra hetaje telefanavańnie z łaskavaj prośbaj nie pravodzić dadzienaje mierapryjemstva.Ale ž – ničoha, heta ŭsiaho tolki telefanavańnie. Pakul ža nie prychodziać…I prosta dziva biare, jak takoje telenafanavańnie moža ździejśnić narmalny i adekvatny čałaviek. Pakorpaŭsia b u svaim radavodzie pradstaŭnik orhanaŭ pilnavańnia, a moža, jakraz pa jaho svajakoŭ prychodzili jakich 75 hod tamu…
Navošta piłavać suk, na jakim siadziš i hniusna škodzić ludziam, jakija ŭzdymajuć kulturu tvajoj krainy? Tut varyjanty dva. Albo ŭ dziaržaŭnyja orhany prabralisia čužyncy, jakija staviać za metu schavana škodzić intaresam dziaržavy i spryjać ścirańniu nacyjalnaj pamiaci. Albo škodziać svaje ž ludzi, biełarusy, pierad jakimi pastaŭlena zadača źniščać u zarodavym stanie ŭsio, što choć niejkim čynam moža paspryjać źmienam u hramadstvie. U tym liku i dumki.
Bo niebiaśpieku ŭjaŭlajuć zusim nie biaskryŭdnyja śpievy «Pałaca» i nie sam łahodny i palitkarektny Chamienka. Niebiaśpieku ŭjaŭlaje aŭdytoryja hurtu.Bo jany lubiać svajo, a značyć šanujuć historyju i naohuł zanadta šmat razumiejuć u hetych raskładach, i možna tolki zdahadavacca jakija kramolnyja dumki zaradžajucca ŭ ichnich hałovach, kali jany słuchajuć «Jak pajdu ja ŭ novuju kaniušniu».
Cikava, a što skaža ministr Łatuška dy inšyja dziaržsłužačyja, jakich «pałacaŭcy» chacieli zaprasić na kancert.Dy ničoha – 100%. Usie pramaŭčać. I pakul usie my budziem maŭčać i vykonvać niezakonnyja zahady dy słuchacca prośbaŭ z boku prajdziśvietaŭ, nas buduć taptać. A tam hladziš i sapraŭdy – nie patelefanujuć, a pryjduć. Pa ciabie samoha.
Zahałoŭnaja pieśnia z alboma "Pałaca" "Koła hrukatała" ŭ novaj redakcyi
