23 kastryčnika muzyki paviedamili, što kancert «Pałaca», prymierkavany da 20-hodździa hurtu, admienieny. Maŭlaŭ, pa pryčynach, jakija nie zaležać ad arhanizataraŭ. A ŭžo na nastupny dzień administracyja Teatra biełaruskaj dramaturhii, dzie i płanavaŭsia kancert, znoŭ dazvolili vystupleńnie. Lidar «Pałaca» Aleh Chamienka adkazaŭ na pytańni «NN».
«NN»: Aleh, Vy pryznalisia ŭ Fejsbuku, što ŭčora Vam było 76 telefanavańniaŭ, i što Vy trymajeciesia na valarjancy i pustyrniku — takija niervy...
Aleh Chamienka: Usio adrazu. I słovy padtrymki, i prablemy, i emocyi, i arhanizacyjnyja pytańni... Telefon ad vucha nie adkładvaŭsia.
«NN»: Znoŭ prablemy z kancertam?
ACH: Kamu cikavyja hetyja prablemy? My daviedalisia pra admienu kancerta značna raniej, čym publika. I ja prapanavaŭ muzykam užo na hety čas zaniacca svaimi płanami. A tut usio treba viartać...
Učora nadrukavali i naš kampakt-dysk.
«NN»: Zrazumieła, jakija pačućci byli paśla naviny pra admienu kancerta. A što adčuli paśla jaho viartańnia?
ACH:
Radaści my nie adčuli.
«NN»: Čamu?
ACH:
Było hidka, a tut stała niazručna.
Ja telefanuju tym ludziam, jakija abiacali dapamahčy zrabić bankiet. Admianiaju, zatym znoŭ viartaju nazad. Šmat słoŭ daviałosia vysłuchać, maŭlaŭ, vyznačyciesia, tak nie robicca. Heta adzin z prykładaŭ.
«NN»: Takaja admiena niejak paŭpłyvała na prahramu kancerta?
ACH: Tak.
Siarhieja Truchanoviča nie budzie — jaho zamienić inšy hitaryst. Astatnija muzyki pavinny viarnucca ŭ Biełaruś.
Pierarežysiravali prahramu: paśladoŭnaść kancerta źmianiłasia.
Usie kvitki raskuplenyja, abstalavańnie, jakoje my chacieli, da kancerta vierniecca...
«NN»: Žurnalist Siarhiej Budkin ličyć mahčymym umiašalnictva ministra kultury Paŭła Łatuški situacyju z vystupleńniem. Vam ministr nie telefanavaŭ?
ACH: Kaniečnie, nie.
U nas zaŭsiody byli dobryja adnosiny z Paŭłam Paŭłavičam, ale nijakich takich razmoŭ nie było.
Kancert hurtu «Pałac» adbudziecca 26 kastryčnika ŭ Teatry biełaruskaj dramaturhii (vuł. Krapotkina, 44). Na im prezientujuć muzyčnuju prypavieść «Sałdat-doktar» i novy albom «Koła hrukatała».