Za dzieviać miesiacaŭ hetaha hoda na darohach Minska zahinuŭ 51 čałaviek. Ź ich 10 — na Minskaj kalcavoj aŭtadarozie. U suviazi z vysokaj avaryjnaściu na hetym učastku vulična-darožnaj sietki z 23.00 26 kastryčnika da 03.00 27 kastryčnika DAI Zavodskaha rajona praviała śpiecapieracyju "Filtr".
Jak paviedamili ŭ DAI HUUS Minharvykankama, na MKAD pablizu vulicy Taškienckaj z vykarystańniem časovych darožnych znakaŭ, konusaŭ pavyšanaj bačnaści i sihnalnych lichtaroŭ byli ŭtvorany svojeasablivyja kalidory.
Stopracentnaj praviercy padviarhalisia ŭsie transpartnyja srodki, prajechać možna było tolki pa adnoj pałasie i z adnoj umovaj — prajści pravierku ŭ inśpiektara.Pracavali adrazu try ekipažy DPS DAI, supracoŭniki ABEZ, patrulna-pastavoj słužby milicyi, a taksama apieratyŭnyja supracoŭniki adździeła narkakantrolu.
U chodzie apieracyi vyjaŭleny try kiroŭcy, jakija nie majuć prava kiravańnia, a taksama dva kiroŭcy ŭ stanie ałkaholnaha apjanieńnia, pryčym adzin ź ich — śviatar, jaki admoviŭsia prachodzić miedycynski ahlad. U dačynieńni da jaho składzieny administracyjny pratakoł.
Inšy kiroŭca ŭ hetym hodzie ŭžo zatrymlivaŭsia niećviarozym, pryčym raniej minčuk byŭ sudzimy za anałahičnaje złačynstva. Na jaho zaviali kryminalnuju spravu pa č. 2 art. 317-1 KK,jakaja praduhledžvaje adkaznaść u vyhladzie štrafu (da 1.000 bazavych vieličyń — da 100 młn. rubloŭ), ci papraŭčych rabot na termin da dvuch hadoŭ ci aryštu na termin da šaści miesiacaŭ, abo pazbaŭleńnia voli na toj ža termin z pazbaŭleńniem prava zajmać peŭnyja pasady abo zajmacca peŭnaj dziejnaściu.
