Listy ź Ivadzimy (Letters from Iwo Jima)
ZŠA, 2006, kalarovy, 141 chv.
Režyser: Klint Istvud
Roli vykonvajuć: Kien Vatanabe, Kazunary Ninomija, Cuošy Ichara, Rua Kase, Sida Nakamura, Chirosi Vatanabe
Žanr: Vajskovaja drama
Adznaka: 8 (z 10)
Premija «Oskar» za najlepšy huk i premija «Załaty hlobus»
Druhaja Suśvietnaja vajna. Japonskaja armija abaraniaje vostraŭ Ivadzimu. Kali amerykancy zachopiać hety placdarm, im budzie adkryty šlach da hałoŭnych vyspaŭ. Japonskija žaŭniery adstrelvajucca z kamiennych katakombaŭ, ale vyniki vajny pradvyznačanyja…
«Listy ź Ivadzimy» – druhaja častka dylohii Klinta Istvuda. «Ściahi našych baćkoŭ» raspaviadali pra bitvu vačyma amerykancaŭ, hieroi «Listoŭ» – japoncy.
Karcinu ŭžo paraŭnoŭvali z bykaŭskim «Žuraŭlinym krykam» dyj inšymi tvorami biełaruskaha aŭtara: stan trahičnaje biezvychodnaści, uspaminy, kanflikt idealahičnaha fanatyzmu j čałaviečnaści.
Popielna-zialonaja hama pasuje nia tolki «japonskaj historyi», ale j bykaŭskim vajskovym realijam, finał pradkazalny, dziejańnie nietaropkaje – i zaciahvaje. My bačym «akopnuju praŭdu» vajny (za što tak dziaŭbli Bykava), prapahandovuju histeryju – i hodnaść, nasupierak zababonam.
Japonski hienerał, jaki pryjechaŭ bicca za Ivadzimu – heta mudry bykaŭski kamandzir; piekar, jaki nia viedaje, jak trymać vintoŭku – prosty biełaruski chłapiec. Jość i svajo NKVD – tajnaja vajskovaja palicyja…
Ale japonskaja trahiedyja – pavodle Istvudu – adroźnivajecca ad bykaŭskich katastrofaŭ. Pamierci, zastaŭšysia čałaviekam – adkazny vybar bykaŭskaha hieroju, jaki vykonvaje svoj apošni abaviazak. I heta dla eŭrapiejca limit.
Vyžyć, zastaŭšysia čałaviekam, nasupierak epidemii samazabojstvaŭ, i vykanać svoj abaviazak – heta limit dla japonca. Bo NKVDzist u kožnaje hałavie: nie vykanać zahad adstupać, padarvać siabie harmataj, prymusić padryvacca padnačalenych (pakutliva-nievynosnaja scena). I pa-nad usim hetym – zachavanyja listy z žyvymi hałasami ludziej.
«Amerykanski samuraj» Istvud zrabiŭ karcinu praniźliva-humanistyčnuju j ahulnačałaviečuju. Biaz hučnaha patasu, niakidkuju i ekzystencyjna-strymanuju.
Sapraŭdnaje biełaruskaje kino pavodle Vasila Bykava.
Karcina demanstravałasia ŭ Kinafarmacie «4ch4» . Seansy z 23 pa 29 krasavika ŭ mienskim kinateatry «Mir» a 18.40.
Taksama na ekranie Flandryja, Hanibał: Uzychodžańnie, Typu krutyja mianty.
