Na turnikach jany miksujuć himnastyku, brejk-dans i siłavyja praktykavańni. 34mag pahladzieŭ na treniroŭku mienskich turnikmenaŭ i pierakanaŭsia, što z hienafondam nacyi ŭsio ŭ paradzie.
«Nadakučyła čakać aŭtobusa – patrenirujsia»
Čatyry chłopcy rašuča iduć pa łabiryntach dvaroŭ Kuncaŭščyny. Ich sinija krosy pravalvajucca ŭ pieršy śnieh: na vulicy siońnia nie najlepšaje dla trenirovak nadvorje. Kala stadyjona himnazii № 13 nas čakajuć jašče piać chłopcaŭ, turniki «patryjatyčnych» koleraŭ i brusy.
Chutka pieraapranuŭšysia, turnikmeny ŭklučajuć zadzirysty rep i pačynajuć pakazvać nam, što takoje street workout.Jany robiać «vychady na dźvie», «soniejki», pa dziesiać siekund trymajuć cieła pad pramym vuhłom i adciskajucca na śniezie. Vyhladaje hetaja kampanija amataraŭ vuličnaha fitnesu, jak nievialikaja banda z hieta NYC: najkaŭskija kiedy, bajki z kapiušonami i palčatki na rukach. Na ichnich majkach i bajkach hordyja nadpisy «Street Workout Minsk» i «Generation Workout». A na adnoj navat pierakreślenyja butelka harełki, cyharety i špryc dy nadpis «My – novaje pakaleńnie». Tut usie stroha za zdarovy ład žyćcia.
Praz 20 chvilin akrabatyčnych trukaŭ i siłavych praktykavańniaŭ pamiraje akumulatar na kałonkach, i my źbirajemsia ŭ koła, kab papić harbaty. Paralelna abmiarkoŭvajem, adkul street workout źjaviŭsia ŭ biełaruskich spalnych rajonach.
Street workout (abo ghetto workout) zaradziŭsia ŭ 1990-ja ŭ čornych «reziervacyjach» amierykanskich miehapolisaŭ.Hrošy na trenažornuju zału ŭ nietrach Harlema i Bruklina byli nie va ŭsich, zatoje šmat u kaho było žadańnie vyhladać, jak Ŭił Śmit. Tamu amierykanskija chłopcy vyrašyli pracavać z tym, što było pad rukoj: z turnikami, brusami dy naohuł ź lubymi haradskimi abjektami, jakija chopić fantazii pieratvaryć u trenažor.
«Ideja workout u tym, što ty možaš zajmacca dzie zachočaš, – addychaŭšysia paśla ŭdarnaha padychodu, raspaviadaje Stas.– Nadakučyła čakać aŭtobusa – patrenirujsia. Padciahnisia ci patrymaj «ściažok» pad pramym vuhłom. Ludzi, viadoma, u nas časam dziŭna na takija dziejańni reahujuć: babki kryčać, što ja vandał i łamaju prypynak».
Tut ruch padchapili entuzijasty nakštałt znakamitaha Dzianisa Minina z Dnieprapiatroŭska. Minin zrabiŭsia sapraŭdnaj uoutube-zorkaj dziakujučy svaim videa i pa-pacansku prostaj, ale pryciahalnaj fiłasofii. Ciapier jon adkryvaje admysłovyja workout-placoŭki, pradaje firmovuju atrybutyku, jeździć z pakazalnymi vystupami i maje 115 tys. padpisčykaŭ «Vkontaktie». Miarkujučy z taho, kolki razoŭ mienskija chłopcy kažuć jaho imia, biełaruski workout svaim naradžeńniem šmat u čym abaviazany mienavita Mininu.Da pačatku 2000-ch workout pieratvaryŭsia ŭ paŭnavartasnuju subkulturu, jakaja pastupova vypaŭzła z amierykanskaha hieta na bahaty turnikami postsaviecki abšar.
«Na vulicy niama lusterkaŭ»
Paśla karotkaha pierapynku chłopcy jašče 30 chvilin demanstrujuć svoj prafiesijny arsienał. Jany daloka adyšli ad prostych padciahvańniaŭ, i majstar-kłas bolš nahadvaje sumieś akrabatyki, parkuru i siłavych praktykavańniaŭ.Takaja raznastajnaść dapamahaje nakačać amal usie hrupy ciahlic biez pachodaŭ u trenažorku.
«Vulica adroźnivajecca ad fitnes-kłuba tym, što na vulicy niama lusterkaŭ, – raspaviadaje Stas, jaki padciahvajecca ŭžo navat biez majki.– Na vulicu ludzi prychodziać zajmacca, a nie hladzieć adzin na adnaho. Plus ty pracuješ z vahoj svajho cieła, zajmaješsia na śviežym pavietry. Nichto nad taboj nie staić i nie kaža, što ty pavinien rabić. Usio zaležyć ad tvajho ŭłasnaha žadańnia». «I hrošaj płacić nie treba», – dadaje niechta, i turnikmeny ŭchvalna kivajuć.
Takaja demakratyčnaść padkuplaje pieravažna prostych chłopcaŭ sa spalnych rajonaŭ.Pavodle turnikmenaŭ, u Miensku street workout zajmajucca 300–500 čałaviek. Siaredni ŭzrost amataraŭ – 15–18 hadoŭ, ale jość i 10–12-hadovyja chłopčyki, jakija padciahnucca našmat bolš razoŭ, čym siaredni sałdat biełaruskaj armii.
Sami treniroŭki dzielacca na statyčnyja, techničnyja i dynamičnyja. Statyčnyja – kali ty ŭ statycy i ŭ ciabie ŭsio cieła naciataje siekund dziesiać ci bolš. Dynamičnyja – heta typovyja padychody na siłu. Techničnyja – heta akrabatyčnyja elemienty, samyja vidoviščnyja i efiektnyja.
«Što treba spačatku? Lamki, palčatki i žadańnie, – kaža turnikmen Loša naprykancy treniroŭki.– Lamku možna zrabić z remienia biaśpieki abo šlejek partfiela, palčatki padyduć samyja tannyja, a žadańnie – užo ad vas zaležyć. Bolšaści chapaje dzion na piać».
«Nie chočacca pieratvaracca ŭ adnaho sa statku»
Praz hadzinu intensiŭnaj treniroŭki ruchajemsia da hałoŭnaj kropki hramadskaha charčavańnia na rajonie – univiermaha «Talin».
U kafieteryi zamaŭlajem zialonuju harbatu i razvažajem pra toje, što street workout – heta nie prosta sport, a ład žyćcia.I hałoŭnyja jaho składniki – admova ad ałkaholu, nikacinu i narkaty dy, viadoma, viera ŭ svaje nieabmiežavanyja mahčymaści.
«My nie pjem, nie palim, nie ŭžyvajem narkotykaŭ. Našmat pryjemniej kupić šakaładku zamiest cyharet, sok – zamiest harełki i piva,– čuju ad Stasa dzivosnuju dla 17-hadovaha junaka mudraść. – Nie chočacca pieratvaracca ŭ adnaho sa statku».
My idziem u mietro i ŭžo damaŭlajemsia z apierataram, kali ŭ nas budzie pieršaja street workout treniroŭka. Ja skardžusia chłopcam na toje, što ŭ mianie ŭ dvary niama navat brusoŭ. «Ničoha strašnaha, – kaža 19-hadovy Loša. – U Dzianisa Minina spačatku taksama byŭ adzin turnik na rajonie, a bačyš, jak jon niadrenna raźviŭsia. I ŭ ciabie atrymajecca».
