Na nastupny dzień ich tavar źjavicca na pryłaŭkach kramaŭ inšych litoŭskich pradprymalnikaŭ. Zrešty, kupcoŭ šmat i z-za miažy. Aŭto ź biełaruskimi, łatvijskimi ci navat estonskimi numarami — nie redkaść. Šop-tury pryjazdžajuć navat sa Skandynavii. Ci akuplaje siabie pajezdka ŭ Harunaj?
Krama na kołach
Užo a 6-j ranicy składana znajści svabodnaje miesca na parkoŭcy.Abjazdžaju rynak z advarotnaha boku, tut volnych miescaŭ bolš. Ale treba być aściarožnym, kab nie zaniać «čužoje» miesca. «Vy budziecie tut handlavać?» — adrazu padychodzić da mianie žančyna. «Nie…» — «Tady adjedźcie nazad, kab byŭ padychod da našaj mašyny, ja budu tut tavar raskładvać». Jana z mužam pryjechała z Alitusa, što za 100 km ad Vilni. Stolki ž jechać ad jaje doma da Polščy. Stary «Falksvahien» davierchu zabity pralnymi paraškami.
Naprykład, 4,8-kiłahramovy «Piersił» možna nabyć za 100 tysiač rubloŭ — znajdzicie takija ceny ŭ Biełarusi.Jašče niekalki hadzinaŭ tamu pradaŭcy zakuplalisia im u polskich supiermarkietach na miažy, a ciapier pierapradajuć tavar ź nievialikaj nakrutkaj. Vychodzić usio adno tańniej, čym u vilenskich hipiermarkietach.
Na stajancy štodnia sotni pradaŭcoŭ viaduć handal prosta z bahažnikaŭ mašyn: niechta pradaje kancylarskija tavary, niechta — harbatu i kavu.U Biełarusi takich impravizavanych rynkaŭ, badaj, nie zastałosia. A voś u Harunach takaja forma handlu całkam zakonnaja.
Kitaj ci Polšča?
Čaho na rynku mała, dyk heta zaatavaraŭ, a taksama śviežaj sadaviny i harodniny. Pradaŭcy rajać źviartacca na inšy vilenski kirmaš, Kalvaryjski.Biełarus, jaki pryvyk zakuplacca na minskich Ždanovičach, budzie ŭ zachapleńni. Asartymient pad Vilniaj taki samy ci navat bolšy, zatoje ceny našmat mienšyja. Roźnica navat u dva razy!Zatoje ŭ Harunach šmat adzieńnia.
Naprykład, mužčynskaja zimovaja kurtka kaštuje 300—500 tysiač rubloŭ. Možna jašče i patarhavacca…
Na susiednim pryłaŭku raskładzienyja akuratna pašytyja krasoŭki. «Kolki kaštujuć?» — «50 litaŭ». Heta kala 150 tysiač rubloŭ. «Nie parvucca paśla pieršaj prabiežki?» — «Ty što, heta ž firmovaje, z-pad Varšavy». U adroźnieńnie ad Ždanovičaŭ, na Harunach pradajecca bolš polskaha adzieńnia i abutku. Ci ličyć jaho bolš jakasnym u paraŭnańni z kitajskimi ci tureckimi anałahami? Raz na raz nie prypadaje, pryznajucca pradaŭcy, ale rajać kuplać mienavita polskaje. «A nie sprabavali biełaruskaje adzieńnie ŭ siabie na kropcy pradavać?» Handlary hladziać vyračanymi vačyma, nibyta na varjata.
Evalucyja rynku
Jak i ŭ Biełarusi, haradskija ŭłady i haspadary rynku sprabujuć zrabić handal «bolš cyvilizavanym». Inšymi słovami, pieraciahnuć pradaŭcoŭ z namiotaŭ pad dach. Za miesca ŭ anharach možna brać bolšuju arendnuju płatu.
Spačatku haspadary Harunoŭ zbudavali čatyry vialikija «tematyčnyja» anhary. Naprykład, u adnym ź ich pradajucca aŭtamabilnyja tavary, u druhim sadovaja technika.
Praŭda, davieru da takich zbudavańniaŭ u pradaŭcoŭ niama. Hod tamu adzin taki anhar całkam zhareŭ, razam z usim pakinutym na noč tavaram. Pradprymalnikam daviałosia pačynać svoj biznes z nula.
Ciapier patrochu zapaŭniajecca pradaŭcami jašče bolšaje pamiaškańnie, hihancki trochpaviarchovy kompleks. Jon nahadvaje minski «Impuls» kala Kamaroŭskaha rynku. Užo ciapier prašturchnucca ŭ prachodach miž šklanymi paviljonami składana, a svabodnaj staić jašče z pałovu budynka.
Biełarusy skuplajuć humu
Praz darohu ad rečavaha kirmašu znachodzicca vialiki aŭtarynak. Z uviadzieńniem vialikich mytaŭ na uvoz mašyn u Biełaruś pierahonščyki sastupili miesca pradaŭcam zapčastak, raschodnikaŭ i aksiesuaraŭ. Jechać śpiecyjalna dla taho, kab nabyć masła ci filtry, niemetazhodna. Naprykład, ekanomija na kupli piacilitrovaj upakoŭki matornaha masła Elf skłała ŭsiaho 20 tysiač rubloŭ, na maślanym filtry — kala 10 tysiač.
Ale pa b/u zapčastki ci humu zajechać u Haruny varta.Kamplekt z čatyroch b/u-kołaŭ pamieru R15 viadomaha jeŭrapiejskaha brenda moža abyścisia ŭ $100. Ale najbolšaja ekanomija dasiahajecca pry kupli novaj humy vialikaha pamieru. U paraŭnańni ź minskimi cenami na kožnym kole možna aščadzić da $50. Na miescy pracuje i šynamantaž, kab chucieńka pierakinuć humu.
Niedapracavany servis
Čaho Harunam nie staje, dyk heta dadatkovaha servisu. Kali chočacca padjeści, dyk tolki stojačy, a ŭ mieniu — chot-doh i šaurma. Pakłapaciciesia zahadzia i pra patrebnuju valutu.
Bankamat na šlachu mnie sustreŭsia tolki adzin, abmieńnikaŭ bolš, ale kurs na ich niavyhadny.
Zrešty, pry vialikaj kupli možna ŭhavaryć pradaŭca pryniać jeŭra ci, u krajnim vypadku, dalary. A voś na čeki ci vypisanyja kvitancyi dla atrymańnia TaxFree lepš nie spadziavacca. Da taho ŭzroŭniu raźvićcia rynak u Harunach jašče nie dajšoŭ.
Što skuplajuć biełarusy?
Upakoŭka mołataj kavy — 28 000 rubloŭ za 0,5 kh.
Pralny parašok Percil — 100 000 za 4,8 kh.
Tualetnaja papiera — 25 000 rubloŭ za 16 dvuchsłojnych rułonaŭ.
Kitajskija džynsy — ad 65 000 rubloŭ.
Kitajskaja tannaja technika (prasy/fieny i h.d) — ad 40 000 rubloŭ za štuku.
Daviedka. Rynak Harunaj
Čas pracy: 6.00—14.00 (aproč paniadziełka).
Adras: Vilnia, vuł. Harunu, 68.
Šlach ź Biełarusi: ad pierachodu «Kamienny Łoh» jechać prosta, nikudy nie zvaročvać, až da samoha rynku.
