U Mahilovie zatrymany małady čałaviek, jaki za tysiaču dołaraŭ imknuŭsia pradać aŭtamat «MP-40», bolš viadomy jak «Šmajsier», paviedamiła pres-hrupa UKDB pa Mahiloŭskaj vobłasci. Pryčym sprobu zbytu zbroi ažyćciaviŭ dyrektar kamiercyjnaj firmy, jaki napeŭna viedaŭ ab adkaznasci za takuju spravu.
Ekśpiertyza ŭstanaviła, što aŭtamat datujecca vajennym časam — 1941—45 hadami. Adnak «Šmajsier» znachodzicca ŭ bajavym stanie. Da taho ž u kvatery zatrymanaha znajšli bolš za 2 sotni patronaŭ. Praŭda, zbroja, pavodle pieršych źviestak, jamu nie naležała, a była pieradadziena dla prodažu inšaj asobaj.
Śledstvu jašče daviadziecca adkazać na pytanni ab pachodžanni zbroi. Pošukam dziejučaj zbroi časoŭ Druhoj suśvietnaj vajny zajmajucca tak zvanyja «čornyja kapalniki», jakija časta addajuć znachodki dla pieraprodažu tym, chto nie suprać ryzyknuć i zarabić na hetaj procizakonnaj spravie.
U adnosinach da zatrymanaha raspačata kryminalnaja sprava za niezakonnyja dziejanni ŭ dačynienni da ahniastrelnaj zbroi i bojeprypasaŭ. Adpaviedny artykuł Kryminalnaha kodeksa praduhledžvaje pakarańnie ŭ vyhladzie abmiežavańnia albo pazbaŭleńnia voli terminam da 6 hadoŭ.
