Sud prysudziŭ Maksima Łuzianina da 4,5 hoda kałonii ahulnaha režymu za ŭdzieł u biesparadkach na Bałotnaj płoščy 6 maja 2012 hoda. Advakaty buduć abskardžvać hetaje rašeńnie.
Prakuror patrabavaŭ dla Łuzianina šeść z pałovaj hadoŭ pazbaŭleńnia voli. Abarona prasiła sud pryznačyć jamu ŭmoŭnaje pakarańnie.
Śledstva apaznała ŭ Łuzianinu aktyŭnaha ŭdzielnika sutyknieńniaŭ z palicyjaj, jaki dušyŭ adnaho z AMAPaŭcaŭ.
Łuzianin — adziny z abvinavačanych u biesparadkach padčas pratestavaha mitynhu 6 maja ŭ Maskvie, chto całkam pryznaŭ svaju vinu. Sprava ŭ dačynieńni da jaho była vydzielena ŭ asobnuju vytvorčaść.
Jon znachodziŭsia pad aryštam z 30 maja i prachodziŭ u jakaści abvinavačanaha pa dvuch artykułach: ab udziele ŭ masavych biesparadkach i hvałcie ŭ dačynieńni da pradstaŭnika ŭłady.
Akramia Łuzianina, fihurantami spravy ab udziele ŭ biesparadkach padčas majskaha mitynhu źjaŭlajucca jašče 17 čałaviek. Bolšaja častka ź ich znachodzicca pad aryštam.
* * *
Jak paviedamiŭ z zały suda karespandent ahienctva Rapsi, prakuror padkreślivaŭ, što Łuzianin paddaŭsia zaklikam inšych udzielnikaŭ masavych biesparadkaŭ i dziejničaŭ naŭmysna.
U zaklučnaj pramovie prakuror taksama zhadaŭ «stanoŭčyja charaktarystyki» abvinavačanaha i toj fakt, što ŭ jaho jość niepaŭnaletni syn, i paprasiŭ prysudzić Łuzianina da šaści z pałovaj hadoŭ turmy.
Pavodle abvinavaŭčaha źniavoleńnia,
Łuzianin užyŭ hvałt u dačynieńni da pradstaŭnikoŭ ułady, a mienavita — «sarvaŭ šlem i broniežylet z palicejskaha, nanios jamu šmatlikija ŭdary, jakija pryviali da strasieńnia mozhu», a druhoha supracoŭnika AMAPu źbiŭ z noh.
Z abvinavačvańnia vynikaje taksama, što Łuzianin budavaŭ barykady na šlachu palicyi. Palicyja škodu ad dziejańnia Łuzianina acaniła ŭ $6 tysiač (košt 14 broniežyletaŭ, 29 pałak, šlemaŭ, dvuch miehafonoŭ, vaśmi racyj).
Advakaty nastojvajuć na tym, što papiaredniaja miedycynskaja ekśpiertyza pa ich padabaronnym była praviedziena z parušeńniami, i patrabujuć paŭtornaha psichijatryčnaha daśledavańnia.
Na pasiadžeńnie suda pryjechaŭ adzin ź lidaraŭ apazicyi Alaksiej Navalny. Pavodle jaho słovaŭ, fihuranty «bałotnaj spravy» «ni ŭ čym nie vinavatyja, jany vypadkova patrapili ŭ hetuju situacyju». Jon taksama vykazaŭ mierkavańnie, što Łuzianin pryznaŭ vinu pad ciskam supracoŭnikaŭ pravaachoŭnych orhanaŭ.
