Sustreča z advakatam adbyłasia 9 listapada, paviedamiła žonka palitviaźnia Maryna Adamovič.
Pavodle jaje Mikałaj Statkievič paćvierdziŭ, što jaho pieraviali ŭ inšuju kameru, ź lepšymi ŭmovami, a raniej jaho naviedaŭ pravasłaŭny śviatar.Taksama Maryna Adamovič apaviała pra reakcyju administracyi mahiloŭskaj turmy na skarhu Mikałaja Statkieviča, što ŭ turmie nie vydajuć tualetnaje pryładździe, chacia hrošy z pensii na ŭtrymańnie rehularna adličajuć.
«Jaho sprabavali zapeŭnić, što ź jahonaj pensii, voś z tych sumaŭ, što ledź nie napałovu vyličvajuć, u heta nie ŭvachodziać vydatki na tualetnuju papieru, myła, halaki j hetak dalej. Ale ž, z novaha hodu źniavolenym buduć vydavać usio heta ŭ hetaj turmie. Na heta jon zadaje rytaryčnaje pytańnie, čamu tolki ŭ hetaj turmie? Bo jon dobra viedaje, što nie vydajuć hetaha ani ŭ Škłovie, ani ŭ inšych ustanovach turemnaj systemy. U vyniku ludzi, jakija nia majuć padtrymki zvonku, strašenna azłablajucca».
Na prośbu prakamentavać adstaŭku staršyni KDB Vadzima Zajcava Maryna Adamovič vykazałasia hetak.
«Jon kiravaŭ KDB, uziaŭ na siabie jak kiraŭnik viedamstva adkaznaść za toje, što tam adbyvałasia. Za niezakonnyja ŭtrymańni, za ździeki, za niezakonnyja prysudy. Ad hetaha jamu ŭžo nie admycca».
Były kandydat na prezydenta Mikałaj Statkievič asudžany na 6 hadoŭ źniavoleńnia za padziei 19 śniežnia. Biełaruskaja apazycyja, ułady Eŭraźviazu i ZŠA damahajucca vyzvaleńnia Statkieviča, jakoha ličać palitviaźniem.
9 listapada Eduard Łobaŭ u ivacevickaj kalonii sustreŭsia z ksiandzom. Hetuju navinu Svabodzie pieradała maci palitviaźnia Maryna Łobava. Apošniaja sustreča viernika Łobava ź śviatarom była amal hod tamu.
«U Eduarda siońnia adbyłasia važnaja padzieja, jaho naviedaŭ ksiondz. Jany razmaŭlali, jon pryčaściŭsia. Ksiondz pieradaŭ mnie, što trymajecca jon dobra, nastroj u jaho badziory. Spadziajecca, što takija naviedvańni buduć paŭtaracca».
Jak Maryna Łobava stavicca da adstaŭki staršyni KDB? «Značyć, tam idzie niejkaja baraćba, kali dachodzić da takich hučnych adstavak. Značyć, nie nastolki tam usio spakojna, nie nastolki nadziejna tron trymajecca».
Eduardu Łobavu adbyvać za kratami jašče dva hady i miesiac. Maładafrontaviec byŭ asudžany na 4 hady źniavoleńnia razam sa Źmitrom Daškievičam — abodvuch abvinavacili ŭ chulihanstvie, jakoje nibyta jany ŭčynili 18 śniežnia 2010 hodu. Aktyvisty kažuć pra pravakacyju specsłužbaŭ z metaj izalavać ich napiaredadni prezydenckich vybaraŭ.
