50-tysiačny marš nacyjanalistaŭ u Varšavie supravadžaŭsia sutyčkami z palicyjaj 14

Marš akazaŭsia haračy.

Siarod udzielnikaŭ maršu byli i biełarusy.

Až šeść šeściaŭ prajšło sioleta ŭ Varšavie na Dzień niezaležnaści, jaki palaki adznačajuć 11 listapada. Pryčym sioleta polskaje hramadstva adznačyła śviata ŭ napiataj atmaśfiery:

nacyjanalna-kansiervatyŭnaja apazicyja abvinavačvaje libieralny ŭrad Donalda Tuska ŭ manapalizacyi ŚMI, karupcyjnych poviaziach z bujnym biznesam. I hałoŭnaje, balić pamiać pra katastrofu polskaha ŭradavaha samalota pad Smalenskam.

Tam zahinuŭ pravy prezident Kačynski, a rasśledavańniem zajmajucca struktury libieralnaha ŭrada Tuska. Niadaŭniaja publikacyja źviestak pra najaŭnaść śladoŭ vybuchoŭki na abłomkach Tu-134 padliła aleju ŭ ahoń. Prakuratura abvierhła viersiju haziety, ale pazicyja Rasii, jakaja admoviłasia viarnuć abłomki, i niazdolnaść urada Tuska dabicca ad Maskvy lepšaj supracy sa śledstvam padsyčajuć teoryi zmovy.

Zvonku navat dziŭna bačyć, jakaja nianaviść panuje ŭ polskich palityčnych kołach.

Zdavałasia b, jość demakratyčnyja miechanizmy, jość svabodnyja ŚMI, adnak sprečki z parłamienta i staronak haziet pierachodziać na vulicy.

Tak było i siońnia. Svoj marš arhanizavaŭ prezident krainy Branisłaŭ Kamaroŭski. Jaho ŭdzielniki ŭskłali kvietki da pomnikaŭ vialikich dziejačoŭ epochi zavajavańnia Polščaj niezaležnaści, dziejačaŭ roznych łahieraŭ: sacyjalista Piłsudskaha, nacyjanalista Dmoŭskaha, pijanista Padareŭskaha…

Na prezidencki marš sabrałasia tolki 10 tysiač čałaviek. A voś na šeście pravaj apazicyi — až 50. Siarod sabranych byli i futbolnyja fanaty, i ŭdzielniki radykalnych hrupovak.

Jany i raspačali sutyčki z palicyjaj ad momantu zboru: zadymili fajery, palacieŭ bruk. Tym nie mienš, demanstracyja prajšła pa zadumanym maršrucie, choć na jaje šlachu i było zatrymana kala 140 čałaviek.

Možna prahnazavać, što polski palitykum u bližejšyja hady zastaniecca mocna padzielenym na levalibieralny i pravakansiervatyŭny łahier. Pryčym ich baraćba budzie i nadalej nahadvać «vajnu na vyniščeńnie», a nie supiernictva idej. Hety padzieł nie asabliva ŭpłyvaje na zamiežnuju palityku krainy — jaje pryjarytety niaźmiennyja, ale ŭ vyniku jaho palityki stajuć bolš schilnymi da vykarystańnia zamiežnapalityčnaj tematyki va ŭnutrypalityčnych patrebach.

U vyniku množacca papulisckija kroki, pryhožyja žesty časta iduć na škodu stratehičnym intaresam. Z hetym treba ličycca i biełarusam.

Pieraciahvańnie navat Dnia niezaležnaści jak toj koŭdry siońnia pra heta nahadała.

Mikoła Buhaj

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH