U suviazi z płanami budaŭnictva AES Biełaruś moža mocna paciarpieć u płanie padtrymki pa humanitarnaj linii
Minsk, 25 krasavika. U suviazi z płanami budaŭnictva ŭłasnaj AES Biełaruś «moža mocna paciarpieć u płanie padtrymki pa humanitarnaj linii». Takoha raźvićcia padziej nie vyklučaje deputat Volha Abramava.
Vystupajučy 25 krasavika ŭ Avalnaj zale Doma ŭrada pry abmierkavańni chodu realizacyi orhanami dziaržkiravańnia rekamiendacyj letašnich parłamienckich słuchańniaŭ na temu «Čarnobyl praz 20 hadoŭ: vyniki i prablemy», V.Abramava nahadała kaleham ab tym, što Ukraina atrymała «kałasalnyja srodki ad mižnarodnaj supolnaści» na vyrašeńnie ŭ tym liku i prablem umacavańnia isnujučaha sarkofaha nad čaćviortym błokam ČAES i stvareńnie novaha, «chacia samaj paciarpiełaj krainaj źjaŭlajecca Biełaruś». «My naohuł nacyja katastrof, — zajaviła deputat. — Vaźmicie, Vialikaja Ajčynnaja vajna. Jak i ŭ jaŭrejskaj nacyi, u nas zahinuŭ kožny treci, ale pra Chałakost viedaje ŭvieś śviet i dapamahaje. U nas paŭtareńnie — ciapier Čarnobyl. Taksama strašnaja biesprecedentnaja katastrofa. I kaniešnie MAHATE vielmi vyhadna mienavita ŭ Biełarusi pabudavać atamnuju stancyju. Dyk niachaj chacia b nam za heta zapłaciać».
Raźvivajučy temu namiečanaha budaŭnictva biełaruskaj AES, V.Abramava kanstatavała: «I nichto nie adkazaŭ mnie na pytańnie, ci ŭličvajecca pry pryniaćci takoha rašeńnia biełaruskim uradam toje, što jadziernaje paliva budzie daražeć z vysokaj dynamikaj, toje, što my pa hetym pytańni nie adychodzim ad pytańnia enierhietyčnaj zaležnaści ŭžo ŭ hetym źvianie — ad pastaŭščyka jadziernaha paliva, a taksama, kudy my budziem chavać adpracavanyja jadziernyja adchody».
Jak zapeŭniŭ parłamientaryjaŭ staršynia pastajannaj kamisii pa prablemach čarnobylskaj katastrofy, ekałohii i pryrodakarystańni Vital Kulik, prapracoŭka pytańnia budaŭnictva AES viadziecca Nacyjanalnaj akademijaj navuk «z ulikam usich faktaraŭ <...>, jakija prysutničajuć pry budaŭnictvie, ekspłuatacyi, źniaćci z ekspłuatacyi i utylizacyi adchodaŭ».
Fota photo.bymedia.net
