Pradstaŭnica Viciebskaha abłasnoha ŭpraŭleńnia śledčaha kamiteta Ina Harbačova admoviłasia paviedamić, ci źjavilisia novyja padazravanyja ŭ kryminalnaj spravie, raspačataj pavodle artykuła «Chulihanstva» pa fakcie vybuchu piratechničnaj pryłady ŭviečary 11 listapada.
«Na ciapierašni momant upraŭleńnie Śledčaha kamiteta pa Viciebskaj vobłaści kamientaroŭ žurnalistam nie daje i pryčynaŭ admovy nie tłumačyć!» — adzinaje, što skazała spadarynia Harbačova ŭ telefonnaj razmovie.
Z hetych słovaŭ možna tolki mierkavać, što sprava nie skasavanaja. Ale inšyja detali nieviadomyja.
Apošniaj zajavaj Śledčaha kamitetau pa spravie vybuchu kala viciebskaha KDB było aficyjnaje paviedamleńnie, raspaŭsiudžanaje niekalki dzion tamu. U im havaryłasia, što ŭsich zatrymanych — a ich u pieršyja hadziny paśla vybuchu było niekalki dziasiatkaŭ — užo adpuścili. U tym liku i troch čałaviek, jakija zastavalisia padazravanymi pa hetaj spravie ciaham troch sutak. I što na toj momant padazravanych u ździajśnieńni vybuchu ŭ Śledčaha kamiteta nie było ŭvohule.
0
0
0
0
0
0