Mikałaj Dziadok, asudžany na čatyry z pałovaj hady kałonii ŭzmocnienaha režymu za ŭdzieł u akcyjach anarchistaŭ, moža być pieraviedzieny ŭ turmu,paviedamiŭ jaho siabar Alaksandr Jaraševič.
Jaraševič 24 listapada atrymaŭ ad Dziadka list. «Jon piša, što dniami ŭ škłoŭskaj kałonii № 17, dzie jon adbyvaje pakarańnie, adbyłasia kamisija, jakaja pastanaviła, što Dziadok nie staŭ na šlach vypraŭleńnia i praciahvaje akazvać zhubny ŭpłyŭ na inšych źniavolenych. U suviazi z hetym było vyrašana nakiravać spravu Mikałaja ŭ sud dla vyrašeńnia pytańnia pra pieravod jaho ŭ turmu strohaha režymu», — skazaŭ Jaraševič.
«U suviazi z hetym niezrazumieła, na kaho jon akazvaje zhubny ŭpłyŭ», — adznačyŭ Jaraševič.Pavodle jaho słoŭ, Dziadok znachodzicca ciapier u pamiaškańni kamiernaha typu kałonii, pryčym siadzić u kamiery adzin.
Jon paviedamiŭ, što Dziadok atrymaŭ u kałonii 22 spahnańni.«Sud, napisaŭ Dziadok, adbudziecca na hetym tydni, jak miarkujecca, 29 listapada, choć data pasiadžeńnia dakładna nie viadomaja. Ale jon napisaŭ mnie ŭ liście, kab nadalej ja ŭžo pisaŭ na adras mahiloŭskaj turmy № 4. Heta značyć jon upeŭnieny, što jaho pieraviaduć u turmu», — skazaŭ Jaraševič.
Jon taksama adznačyŭ, što ŭmovy ŭ turmie buduć bolš žorstkimi, čym u kałonii.«Ź pieravodam u turmu budzie mienš spatkańniaŭ z rodnymi, mienš zvankoŭ damoŭ, jon uvieś čas budzie znachodzicca ŭ kamiery i tolki raz u dzień dazvolena prahułka ŭ turemnym dvoryku dva na dva mietry», — dapoŭniŭ Jaraševič.
Pavodle jaho słoŭ, sam Dziadok źviazvaje dziejańni administracyi kałonii ŭ dačynieńni da jaho z tym, što admaŭlajecca padpisvać prašeńnie ab pamiłavańni na imia prezidenta Biełarusi, bo ličyć siabie nievinavatym.
Mikałaj Dziadok, a taksama Ihar Alinievič, Alaksandr Franckievič, Maksim Vietkin i Jaŭhien Sielivončyk, jakija prachodzili ź im pa adnoj spravie, byli asudžany sudom Zavodskaha rajona Minska 27 maja 2011 hoda. Jany byli pryznany vinavatymi ŭ złačynstvach, praduhledžanych č. 2 art. 339 Kryminalnaha kodeksa Biełarusi (złosnaje chulihanstva) i č. 2 i 3 art. 218 KK (naŭmysnaje źniščeńnie abo paškodžańnie majomaści). Im inkryminavaŭsia šerah napadaŭ na budynki i padpały, u pryvatnaści praviadzieńnie niesankcyjanavanaj antyvajennaj akcyi kala budynka Ministerstva abarony ŭ 2009 hodzie, zakidvańnie butelkami z zapalnaj sumieśsiu terytoryi pasolstva Rasii ŭ Minsku i budynka Centra izalacyi pravaparušalnikaŭ na vulicy Akreścina ŭ 2010 hodzie.
Apazicyjnyja i pravaabarončyja arhanizacyi ličać Mikałaja Dziadka palitźniavolenym.
