Siońnia ŭ Nacyjanalnym vystaŭnym centry pačałasia XI Mižnarodnaja specyjalizavanaja vystava «ŚMI ŭ Biełarusi». Na forumie, jak i hod tamu, pradstaŭlenyja spres dziaržaŭnyja ŚMI
Dziela ŭračystaha adkryćcia vystavy na scenu zaprasili ministra infarmacyi Ŭładzimiera Rusakieviča, ministra kultury Ŭładzimiera Matviejčuka, načalnika hałoŭnaha idealahičnaha ŭpraŭleńnia Administracyi prezydenta Aleha Pralaskoŭskaha, staršyniu Biełdziaržteleradyjokampanii Alaksandra Zimoŭskaha, kiraŭnikoŭ dziaržaŭnych telekanałaŭ Ryhora Kisiala, Juryja Kazijatku, redaktaraŭ najbujniejšych dziaržhazetaŭ Paŭła Jakuboviča dy Anatola Lemiašonka, a taksama ministra pa spravach druku dy infarmacyi Maskoŭskaj vobłaści Siarhieja Maisiejeva. Pobač sa scenaj stajała staršynia Centarvybarkamu Lidzija Jarmošyna.
Pralaskoŭski začytaŭ vitalnaje słova ad Łukašenki, sens jakoha zvodzicca da taho, što ŭsiebakovaja dapamoha dziaržavy robić biełaruskija ŚMI pa‑sapraŭdnamu svabodnymi i prafesijnymi. Nichto z haściej nie pramaŭlaŭ pa‑biełarusku.
Ministar infarmacyi paviedamiŭ, što na forumie pradstaŭlenyja bolš za 700 udzielnikaŭ ekspazycyi. Padkreślivałasia, što siarod ich prysutničajuć i zamiežnyja vydaviectvy. Najbolš ža adčuvałasia prysutnaść maskoŭskaj presy. Byli zaŭvažanyja vydańni Kitaju, ź jakimi možna było aznajomicca na ekspazycyi, ładžanaj dyplamatyčnym pradstaŭnictvam hetaj krainy. Minimalizmam vyłučałasia ekspazycyja Deutsche Welle — adnajmiennaja šylda i vyklučany televizar «Samsung».
Kožnaja vobłaść prezentavałasia asobnymi mini‑placoŭkami. Miž saboju hetyja vystavy amal ničym nia roźnilisia — adnatypnyja nazvy abłasnych dy rajonnych hazetaŭ, ščaślivyja tvary na fotazdymkach pieradavicaŭ, dy pieravažna rasiejskaja mova. Uvohule, vyhladała na toje, što ŭsiu reklamnuju atrybutyku — baloniki ź lahatypami, hazetaŭ, telekanałaŭ i radyjo, buklety i kalandaryki, — zamovili ŭ adnaho vytvorcy. Heta, mabyć, prymusiła ŭdzielnikaŭ ekspazycyi rabić peŭnyja zachady, kab padvysić naviedvalnaść svaich vystavaŭ. Siarod abłasnych placovak vyłučyłasia bieraściejskaja — apranutyja ŭ firmovyja bejsbołki maładyja ludzi prapanoŭvali naviednikam vystavy svaju pradukcyju pad Łui Armstranha. Rej u zavablivańni naviednikaŭ viali vajskovyja ŚMI — kala ichniaha ŭzbrojenaha kulamiotam matacykłu ŭvieś čas było ludna. Vyłučalisia taksama apranutyja ŭ lisicu i lesavika supracoŭniki «Lasnoj haziety».
Biełaruskaja mova prysutničała na placoŭkach aficyjnych biełaruskamoŭnych vydańniaŭ — «Źviazdy», «Nastaŭnickaj haziety», «Biarozki» dy inš.
Forum praciahniecca try dni. U prahramie — praviadzieńnie druhoha biełaruskaha infarmacyjnaha forumu «Sacyjalnaja adkaznaść ŚMI», a taksama ŭrečeńnie premii «Zołotaja litiera»
