U Homieli prajšła matčavaja sustreča pa šachmatach kamand pradprymalnikaŭ i padatkovych inśpiektaraŭ. Inicyjatyva praviadzieńnia spartyŭnaha spabornictva naležyła pradprymalnikam, členam hramadskaha abjadnańnia «Adzinstva». Śpiecyjalisty IMPZ pa Homielskaj vobłaści pryniali vyklik. Turnir prachodziŭ na siami doškach. Jak paviedamiła BiełaPAN vykanaŭčy dyrektar HA «Adzinstva» Ina Kustava, takija spabornictvy pravodzilisia ŭ Homieli ŭpieršyniu.
Siarod metaŭ praviadzieńnia padobnych sustreč I.Kustava ličyć ciesnyja znosiny pamiž pradprymalnikami i padatkovymi rabotnikami: «Hulnia, jak i humar, i śmiech zhładžvaje pamiž ludźmi ŭsialakija barjery i nieparazumieńni. Nie sakret, što isnuje peŭny antahanizm: padatkovyja orhany — padatkapłatniki. Pieršyja ličać, što padatkapłatniki štości ŭtojvajuć. Druhija ž upeŭnieny, što padatkovyja orhany — kara boskaja, pryjduć da pradprymalnikaŭ i abiaruć da nitki. Hulnia ŭ šachmaty zaklikana pieraadoleć usialakija barjery i stereatypy».
Jak varyjanty areny dla spartyŭnaj sustrečy razhladalisia baksiorski rynh, anhar dla piejntboła, biljardny stoł abo darožka ŭ boŭlinhu. Šachmaty, jak samy intelektualny vid sportu, byli vybrany z uzajemnaj zhody bakoŭ. I.Kustava nie vyklučaje, što za šachmatnaj doškaj mahli sustrecca tyja, «chto doŭha viadzie bai ŭ kabinietach, adstojvajučy svaje intaresy».
Pavodle słoŭ vykanaŭčaha dyrektara HA «Adzinstva», pradprymalniki vysoka aceńvajuć uzrovień padrychtoŭki padatkovych inśpiektaraŭ: «Kamanda homielskich padatkovych inśpiektaraŭ nieadnarazova stanaviłasia pryzioram roznych unutranych spabornictvaŭ. Bolš taho — načalnik inśpiekcyi MPZ pa Homielskaj vobłaści Halina Pašed pa‑siabroŭsku papiaredziła nas, što šancaŭ pieramahčy padatkovych inśpiektaraŭ praktyčna niama».
Hulnia zakončyłasia ŭničyju. Inśpiektary padatkovaj słužby i pradprymalniki raździalili tort u vyhladzie šachmatnaj doški — pryz pieramožcu.
