U Homieli niama blankaŭ ankiet na biełaruskaj movie dla zapisu na centralizavanaje testavańnie. U hetym pierakonvajucca biełaruskamoŭnyja navučency, kali sprabujuć zapaŭniać ustupnyja dakumanty na rodnaj movie.
Z 2 traŭnia da 1 červienia kožny achvočy moža zapisacca na centralizavanaje testavańnie. Jak viadoma, testavańnie źjaŭlajecca adnačasova i ŭstupnymi ispytami ŭ vyšejšuju navučalnuju ŭstanovu. Dla taho, kab trapić na testavańnie, nieabchodna zapoŭnić zajavu pa vyznačanaj formie.
Student apošniaha kursa Biełaruskaha dziaržaŭnaha ŭniversyteta transpartu (BiełDUT) Siarhiej maryć atrymać druhuju vyšejšuju adukacyju pa jurydyčnaj specyjalnaści. 15 traŭnia jon źviarnuŭsia na fakultet prafaryjentacyi i davuzaŭskaj padrychtoŭki svajoj navučalnaj ustanovy, dzie znachodzicca punkt rehistracyi dla ŭdziełu ŭ testavańni. Blank ankiety Siarhiej zapoŭniŭ na biełaruskaj movie. Adnak sakratarka admoviłasia prymać u maładziona ankietu. Jana razdražniona patłumačyła, što dakumanty rehistrujucca praz kamputar i «ŭ takoj movie navat kamputarnaja prahrama nia zdoleje razabracca».
Siarhiej nia staŭ pierapisvać pa‑rasiejsku i źviarnuŭsia da dekana fakulteta davuzaŭskaj padrychtoŭki. Dekan paraiŭ patryjatyčnamu maładzionu źviarnucca ŭ Homielski rehijanalny centar testavańnia. Ale i tam blankaŭ ankietaŭ na biełaruskaj movie nie apynułasia. Urešcie supracoŭniki BiełDUTa pahadzilisia pryniać dakumanty Siarhieja, zapoŭnienyja na rodnaj movie.
Siarhiej prasiŭ pakul nie nazyvać svajho proźvišča, bo pieraścierahajecca, što mienavita jahonuju zajavu na ŭdzieł u testavańni kamputar «vypadkova» nia zdoleje pračytać.
