9 traŭnia
Zatrymańni na Dzień Pieramohi
9 traŭnia padčas śviatkavańnia Dnia Pieramohi ŭ Miensku byli zatrymanyja aktyvisty moładzievych demakratyčnych arhanizacyjaŭ. Siabry inicyjatyvy «Novy šlach» vinšavali veteranaŭ u parku Horkaha. Jany razdavali im paštoŭki z ulotkami, u jakich zaklikali padtrymać moładź, što adstojvaje demakratyčnyja kaštoŭnaści. Supracoŭniki milicyi Leninskaha rajonu padyšli da maładzionaŭ, kali ŭ tych užo nie zastałosia nivodnaj ulotki, i pierapisali ŭ junakoŭ pašpartnyja dadzienyja.
U centry Miensku paśla śviatočnaha salutu byli zatrymanyja 19‑hadovy Illa Šarbinski j 17‑hadovy Raman Bahdanovič. Milicyjantaŭ najchutčej zacikavili znački «Za svabodu!», što nasili chłopcy. Zatrymanych dastavili ŭ RUUS Centralnaha rajonu.
U Mahilovie pratestavali suprać admieny lhotaŭ
U Mahilovie kala 100 studentaŭ pratestavali suprać admieny lhotaŭ. Za akcyjaj, jakaja doŭžyłasia dźvie hadziny, nazirali milicyjanty dy vykładčyki mahiloŭskich VNU.
Moładź praviała pikiet dy arhanizavała zbor podpisaŭ za zachavańnie ilhotaŭ. Studenty praciahnuć źbirać podpisy niepasredna ŭ VNU, a potym pieradaduć ich va Ŭpraŭleńnie adukacyi Mahiloŭskaha harvykankamu. Adzin ź lideraŭ mahiloŭskaj supołki moładzi BNF Alaksandar Anisimaŭ paviedamiŭ, što na hrupu moładzi, jakaja išła na akcyju, napali nieviadomyja ŭ cyvilnym i mocna pabili.
10 traŭnia
Suprać Jarasłava Hryščeni znoŭ uzbudzili kryminalnuju spravu
Adpaviednuju pastanovu aktyvistu niezarehistravanaha «Maładoha frontu» ŭručyła śledčaja Baranavickaha HUUS Julija Askaldovič. U im havorycca, što Ja.Hryščenia paśla zajavy ŭ Baranavickim HUUS, zroblenaj im 20 krasavika 2007 h. ab dobraachvotnym spynieńni ŭdziełu ŭ dziejnaści «MF», «faktyčna praciahnuŭ udzieł u dziejnaści hetaha niezarehistravanaha hramadzkaha ab`iadnańnia pry praviadzieńni šeścia «Čarnobylski šlach» 26 krasavika 2007 h., pra što śviedčać adźniatyja materyjały». Na padstavie hetaha prakuror Baranavič Alaksandar Smal pastanaviŭ uzbudzić kryminalnuju spravu pavodle art. 193‑1 KK (dziejnaść ad imia niezarehistravanaj arhanizacyi).
Maładym sacyjał‑demakratam admovili ŭ rehistracyi
Moładzievamu hramadzkamu abjanańniu «Maładyja sacyjał‑demakraty — Maładaja Hramada» admoŭlena ŭ dziaržrehistracyi. Admova Minjustu matyvavanaja tym, što statut navaŭtvoranaha abjadnańnia nie adpaviadaje patrabavańniam č.3 art.9 zakonu «Ab hramadzkich abjadnańniach».
«Padaviciesia vašymi lhotami!»
Pad Ministerstvam adukacyi ŭ Miensku prajšła akcyja suprać admieny lhotaŭ studentam. Kala troch dziasiatkaŭ aktyvistaŭ ruchu «Za svabodu!» ckinuli kašuli i prakryčali «Padaviciesia vašymi lhotami!» Paśla aktyvisty apranuli bajki z nadpisam «Za svabodu!» dy źnikli. Za akcyjaj naziraŭ achoŭnik budynku, jaki adabraŭ u maładych ludziej mehafon i pryhraziŭ vyklikać milicyju.
Karnaja psychijatryja
Mahiloŭskaj aktyvistcy apazicyi Kryścinie Šacikavaj admoŭlena va ŭzbudžeńni kryminalnaj spravy pa fakcie jaje zatrymańnia i špitalizacyi. Padstava dla admovy — prakuratura Leninskaha rajonu Mahilova praviała pravierku i vyśvietliła, što słužbovyja asoby Mahiloŭskaha abłasnoha psychijatryčnaha špitala, a taksama supracoŭniki PPS UUS Mahiloŭskaha abłvykankamu, jakija pravodzili zatrymańnie i dastaŭlali K.Šacikavu ŭ špital, dziejničali ŭ miežach pravoŭ, jakija nadajucca zakonam «Ab milicyi» i zakonam «Ab psychijatryčnaj dapamozie i harantyi pravoŭ hramadzian pry jaje akazańni». Šacikavu zatrymali na padstavie kalektyŭnaj zajavy, napisanaj nibyta žycharami jaje domu.
Kryminalnaja sprava suprać Šyły
Upraŭleńnie KDB pa Mienskaj vobłaści ŭzbudziła novuju kryminalnuju spravu suprać salihorskaha aktyvista «Maładoha frontu» 17‑hadovaha Ivana Šyły. Śledčy Vitold Alaksiejeŭ paviedamiŭ Ivanu, što sprava ŭzbudžanaja pavodle art. 193 KK RB za dziejnaść ad imia niezarehistravanaj arhanizacyi, i Šyła maje status padazravanaha.
11 traŭnia
Kaciarynu Sadoŭskuju pakinuli ŭ turmie
Pra heta jana paviedamiła ŭ liście dachaty z Homielskaj žanočaj kalonii. Kamisija ŭ kalonii dvojčy vyvučała jaje charaktarystyku j pastanaviła, što «źniavolenaja nia stała na šlach vypraŭleńnia». Nahadajem, pravaabaronca Kaciaryna Sadoŭskaja asudžanaja na 2 hady pazbaŭleńnia voli.
Pieratrus u Šyły
U salihorskaha «maładafrontaŭca» Ivana Šyły, suprać jakoha pačali kryminalnuju spravu, adbyŭsia pieratrus. Kiravaŭ praceduraj major salihorskaha KDB Dziemidovič S.M. Pieratrus praciahvaŭsia 2,5 hadziny. Specłužbisty kanfiskavali natatniki Ivana, znački, presu. Ich zacikaviŭ kamputar chłopca, u jakoha adsutničaŭ systemny blok.
13 traŭnia
Akcyi ŭ padtrymku kaścioła śviatoha Jazepa
Mienskija aktyvisty paviesili na moście na vuł.Niamiha raściažku z zaklikam «Abaronim kaścioł 16 traŭnia, u 19.00». Raściažka pravisieła na moście kala hadziny, pakul jaje nie źniała milicyja. Byli raspaŭsiudžanyja ŭlotki z zaklikam pryjści na supolnuju malitvu za viartańnie kaściołu viernikam, jakaja adbudziecca 16 traŭnia, u Dzień biełaruskaj salidarnaści. Kala samoha chramu adbyvaŭsia zbor podpisaŭ u jaho padtrymku.
Schod intelihiencyi ŭ lesie
IV schod pradstaŭnikoŭ biełaruskaj intelihiencyi z udziełam 100 delehataŭ z roznych rehijonaŭ krainy adbyŭsia va ŭročyščy Prystańka Staŭpieckaha rajonu, na bierazie Niomanu. Na tym samym miescy, dzie 9 lipienia 1906 h. prajšoŭ nielehalny źjezd biełaruskich nastaŭnikaŭ z udziełam Jakuba Kołasa. Udzielniki schodu abrali 47 delehataŭ na Kanhres demakratyčnych siłaŭ i ŭchvalili zvarot z šeraham patrabavańniaŭ da ŭłady.
14 traŭnia
Daškieviča viarnuli na tartak
Palitviazień Źmicier Daškievič znoŭ pracuje ŭ kalonii na lesapilnym ŭčastku. Raniej jon byŭ źmieščany ŭ turemny špital z‑za prablemaŭ z chrybtom. Bolej za tydzień ad Źmitra nie było źviestak. Ciapier jon paviedamiŭ praz znajomych, što pracuje znoŭ tam, dzie i pracavaŭ.
Taciana Sieviaryniec źviarnułasia ŭ sud
Maci palityka Paŭła Sieviarynca Taciana Sieviaryniec źviarnułasia ŭ sud Pieršamajskaha rajonu Viciebsku — jana patrabuje adnavić jaje na pracy ŭ viciebskaj siaredniaj škole №40. Nastaŭnicu z 35‑hadovym stažam zvolnili nibyta za prahuły: načalnik adździełu adukacyi Pieršamajskaha rajonu Ŭładzimier Šłoma, padpisaŭšy zajavu spn.Sieviaryniec na adpačynak za svoj košt, praz kolki dzion admianiŭ rašeńnie. Viarnuŭšysia z adpačynku, T.Sieviaryniec daviedałasia, što prapuściła šeść pracoŭnych dzion. Baranić intaresy nastaŭnicy ŭ sudzie budzie viadomy viciebski advakat Michaił Zamalin. Na sudovaje pasiedžańnie źbirajucca j baćki vučniaŭ siaredniaj škoły №40, dzie Taciana Sieviaryniec vykładała rasiejskuju movu dy litaraturu.
Ściah nad rajvykankamam
Supracoŭniki baranavickaj milicyi abvinavacili aktyvista «Maładoha frontu» Jarasłava Hryščeniu ŭ drobnym chulihanstvie. Padstavaj staŭ videazapis, zrobleny ŭnačy. Kamera zafiksavała, jak «maładafrontaviec» na budynku baranavickaj administracyi zamianiŭ aficyjny ściah na bieł‑čyrvona‑bieły.
Ściahi ŭdzień
U roznych rajonach Miensku byli vyviešanyja nacyjanalnyja ściahi. Pablizu st.m.»Puškinskaja» vializny ściah pravisieŭ bolš za dźvie hadziny. Pryblizna ž stolki prałunali ściahi la płoščy Kalinina dy Akademii mastactvaŭ. Hadzinu minaki nazirali ściah na dachu domu na vuł.Charužaj, što ŭ narodzie zavuć «kukuruzinami». Byŭ zaŭvažany ściah i ŭ mikrarajonie Łošyca.
Kancert ZET i IQ‑48 zabaranili
Supolny kancert hurtoŭ ZET i IQ‑48 musiŭ adbycca ŭ klubie «Arena». Pavodle nieaficyjnaj infarmacyi, paśla zvanka z kamitetu pa idealohii Mienharvykankamu kiraŭnictva klubu admoviłasia ad mierapryjemstva. Jak paviedamiŭ lider «ZET» Lavon Volski, kancert pieranieśli ŭ klub «Katakomby».
