Pieršy namieśnik premjer‑ministra Biełarusi Uładzimir Siamaška, adkazvajučy 25 maja na pytańni deputataŭ Pałaty pradstaŭnikoŭ na sumiesnym pasiadžeńni členaŭ Nacyjanalnaha schodu, nazvaŭ rašeńnie Rasii ab budaŭnictvie naftapravoda ŭ abchod Biełarusi pierš za ŭsio palityčnym.
Nahadajem, dniami ŭrad Rasii ŭchvaliŭ budaŭnictva druhoj vietki Bałtyjskaj trubapravodnaj sistemy ŭ abchod Biełarusi. Adpaviednaje rasparadžeńnie padpisaŭ premjer‑ministr Rasii Michaił Fradkoŭ. U studzieni 2007 hoda, paśla kanfliktu Rasii i Biełarusi adnosna pošlin na tranzit nafty i prypynieńnia pastavak vuhlevadarodnaj syraviny pa naftapravodzie «Družba», što prachodzić pa biełaruskaj teratoryi, prezident Rasii daručyŭ paskoryć raspracoŭku alternatyŭnych maršrutaŭ pastavak nafty ŭ Jeŭropu.
U.Siamaška siońnia nahadaŭ deputatam, što rašeńnie ab budaŭnictvie naftapravoda «Unieča (Branskaja vobłaść) — Prymorsk (Leninhradskaja vobłaść)» było pryniata prykładna try miesiacy tamu. Na dumku pieršaha vice‑premjera, «hety naftapravod nie budzie papularnym», tamu što prajekt źjaŭlajecca dastatkova darahim (prykładna 2,5 młrd. dołaraŭ) i termin jaho realizacyi składaje 3‑3,5 hoda.
«Siońnia pierapracoŭščyki ličać kožny dołar i rady mieć 5‑6 dołaraŭ na tonie prybytku. Tut 24 dołary dadatkovych vydatkaŭ», — padkreśliŭ U.Siamaška. Transpartavańnie kožnaha barela nafty ŭ abchod Biełarusi budzie daražej na 3 dołary, a tony — prykładna na 23‑24 dołary, patłumačyŭ jon. Pry hetym U.Siamaška vykazaŭ upeŭnienaść, što zahruzka biełaruskaha naftapravoda budzie zastavacca raniejšaj.
U.Siamaška taksama paviedamiŭ, što na praciahu piaci hadoŭ płanujecca ŭkłaści ŭ madernizacyju Navapołackaha NPZ pryblizna 630 młn. dołaraŭ i 590 młn. dołaraŭ — u madernizacyju Mazyrskaha NPZ. U vyniku hłybinia pierapracoŭki nafty na hetych pradpryjemstvach składzie 92‑93% (ciapier prykładna 70%). Pavodle słoŭ U.Siamaški, heta «rezka ŭzdymie ekanomiku i papularnaść zavodaŭ». Akramia hetaha, abjom mahutnaści budzie pavialičany z 9 młn. da 12 młn. ton.
Vystupajučy pierad deputatami, U.Siamaška padkreśliŭ, što stvareńnie Biełaruskaj naftavaj kampanii, jakaja pačnie pracu ŭ lipieni, nie pahoršyć adnosinaŭ z rasijskimi pastaŭščykami. «Adnosiny Biełarusi z Rasijaj pa nafcie dla nas zastajucca fundamientalnymi, i nichto ich mianiać nie źbirajecca», — zaznačyŭ jon. Pieršy vice‑premjer padkreśliŭ, što meta hetaj struktury zaklučajecca nie ŭ tym, kab «adyści ad Rasii ŭ kupli nafty i nabyvać jaje dzieści ŭ Narviehii abo na Raterdamskij biržy». Rasija ŭsio roŭna budzie pryjarytetnym pastaŭščykom nafty ŭ Biełaruś. Tym bolš što naša kraina kuplaje tam naftu pa cenach nižej za suśvietnyja, dadaŭ U.Siamaška.
