Mitynh u Kurapatach
Biełarusy paminali Dziadoŭ. Pavodle tradycyi, jakaja skłałasia za 10 hadoŭ, pabyvaŭšy z ranicy na rodnych mahiłach, ludzi pad abied jechali pamianuć achviaraŭ rasiejskaj i savieckaj akupacyi na miescy masavych pachavańniaŭ. Ułady zabaranili tradycyjnaje šeście ŭ hetym hodzie. Bolš za toje, «błakitnyja mundziry» na čale z Čykinym schapili dziasiatak čałaviek z tych, što sabralisia na płoščy Jakuba Kołasa, kab adtul rušyć u Kurapaty. (Uvohule ŭ centar horadu ściahnuli niekalki tysiačaŭ sałdataŭ unutranych vojskaŭ.) U inšych miescach horadu ludziej nie čapali: hrupkami, jakija zbolšaha składalisia z starych i moładzi, mienčuki dabiralisia da Zialonaha Łuhu ad budynku KHB, dzie ŭ 30—80-ch hadach mučyli, ad parku Čaluskincaŭ, dzie rasstrelvali vorahaŭ kamunistyčnaha režymu, ad Akademii Navuk, ad Maskoŭskich mohiłak, dzie byli ŭskładzienyja kvietki da mahiłaŭ słaŭnych suajčyńnikaŭ. Kala sotni čałaviek usio ž prajšli ad mohiłak da Kurapataŭ arhanizavana, pad bieł-čyrvona-biełymi ściahami, sa śviečkami j kvietkami. Vielmi šmat ludziej pryjechali mašynami.
Ludzi razbrylisia pa žałobnym lesie, stavili śviečki tam, dzie paabsiadała ziamla — tam, dzie lažać sotni ludziej. Historyki-amatary prynieśli j vystavili stendy sa zdymkami, što śviedčać pra akty vandalizmu, kali złodziei raskopvali mahiły.
Adbyŭsia mitynh-rekvijem, u jakim uziali ŭdzieł kala 400 čałaviek. Ajciec Andrej (Abłamiejka), śviatar unijackaj parafii Śv.Jazepa, adsłužyŭ paminalnuju imšu, kazanik z evanhielisckaj carkvy skazaŭ słova pamiaci.
Siarod ludziej snoŭdali dziasiatki ahientaŭ specsłužbaŭ u cyvilnym, vyhladajučy kaho im treba z 17 kastryčnika. Prysutničali mnohija zamiežnyja žurnalisty, rychtujučy repartažy pra biełaruski dzień Dziady. U katalickich kaściołach i ŭnijackich cerkvach paminalnyja nabaženstvy adbuducca ŭ aŭtorak, 2 listapada.
Barys Tumar
