Nam by ź Mienskam razabracca
28 kastryčnika, na 60-ja ŭhodki dałučeńnia Vilni da Litoŭskaje Respubliki, adbyłasia pazačarhovaja sesija litoŭskaha parlamentu. Pasiedžańnie adkryŭ staršynia sejmu Vitaŭtas Łandsberhis, jaki zaznačyŭ, što hetaja data nadzvyčaj važnaja, bo «adbyłosia viartańnie Vilni i Vilenskaha kraju Litvie. 60 hadoŭ tamu histaryčnaja spraviadlivaść viarnuła krainie spadčynu».
Z nahody ŭračystaściaŭ staršynia VS RB Siamion Šarecki ŭ Kamitecie pravoŭ čałavieka litoŭskaha Sejmu adkazaŭ na pytańni litoŭskich parlamentaroŭ:
«Pavažanyja kalehi. Nivodzin demakrat naš siońnia, ja vas u hetym zapeŭnivaju, nie pretenduje ni na kolki ziamli pa-za našymi miežami! Prytym heta tyčycca nia tolki Litvy, ale i Rasiei, i Polščy».
Na heta staršynia Kamitetu sp.Zinhierys udakładniŭ:
«Spadar Paźniak, ź jakim u nas dobryja ŭzajemadačynieńni, u 92-m hodzie vysoŭvaŭ hetkija pretenzii».
Siamion Šarecki:
«A ja mahu skazać, što z boku peŭnych litoŭcaŭ ličycca, što Litva ciahniecca až za Narač. Ale nielha ž vychoplivać hetkija rečy j raździmać ich. Ja vam aŭtarytetna zajaŭlaju, što nikoli hetaje pytańnie ŭsurjoz nie padymałasia. Zapeŭnivaju, što nia budzie ŭzdymacca j nadalej, što nibyta stalica Vilnia jość stalicaju Biełarusi. Nam treba dumać pra toje, kab ciapierašniaja stalica Biełarusi — Miensk — staŭ biełaruskim horadam».
Adnosna histaryčnaha statusu biełarusaŭ u Vilni Siamion Šarecki skazaŭ litoŭskim kaleham nastupnaje:
«My, biełarusy, udziačnyja žycharam Vilni ŭsich nacyjanalnaściaŭ, jakija na praciahu doŭhich stahodździaŭ davali mahčymaść pryjaždžać siudy biełarusam i stvarać tut svaje drukarni (ja maju na ŭvazie Skarynu), pačynać tut i našaje piśmienstva, i adukacyju»...
Nahadaju, što litoŭskaje vojska ŭvajšło ŭ Vilniu 23 kastryčnika 1939 hodu paśla taho, jak horad, tak i nie atrymaŭšy aficyjnaha statusu stalicy Zachodniaj Biełarusi, byŭ pakinuty Čyrvonaj armijaj zhodna z pahadnieńniem pamiž fašystoŭskaj Niamieččynaj i stalinskim SSSR, jak i było abumoŭlena ŭ pakcie Mołatava-Rybentropa.
Andrej Staravojtaŭ