«Łancuh svabody»: spantanny i efektny
Biełaruskaja apazycyja navučyłasia pravodzić pryhožyja palityčnyja akcyi. Navat u dziesiacihradusny maroz, u ciomny čas sutak, bieź nivodnaj ulotki ŭ Miensku (pieršy pravał novaha Frontu) i biaz zhadki pra akcyju ŭ «Narodnaj voli» na «Žyvuju ścianu Svabody» pryjšło kala 2000 mienčukoŭ, choć nia ŭsie sa śviečkami, a nia ŭsie tyja, što sa śviečkami — z doncami plastykavych butelek, bieź jakich śviečki hasnuli na viatruzie. Łancuh raściahnuŭsia ad Jakuba Kołasa da kinateatru «Kastryčnik».
Minakoŭ na praspekcie heta mocna ŭražvała. Ašałomlenyja, jany pytalisia, što vymusiła stolkich ludziej u taki maroz stajać na vulicy, a daviedaŭšysia, symbalična dałučalisia.
Akcyja była prymierkavanaja da treciaj hadaviny pieravarotu, a taksama suprać sajuzu z Rasiejaj. Sajuzu nie atrymałasia. Pakul što. Aficyjnaja versija — z-za chvaroby Barysa Jelcyna. (Nieaficyjna kažuć, što Pucin «nia daŭ dziedu tabletak», i taho ŭžo niama.) Ale kožny z tych, chto stajaŭ 24-ha ŭ žyvym łancužku, adčuvaje honar, miarkujučy, što ŭ zryvie haniebnaha padpisańnia jość i jaho, chaj i maleńkaja, ale zasłuha. Pa skančeńni akcyi zatrymali 5 junakoŭ, dvuch ź ich aficyjna papiaredzili.
Kala 1000 čałaviek vyjšli na analahičnuju akcyju ŭ Horadni (troch, u tym prafesara Astroŭskaha, zatrymali), para dziasiatkaŭ — u Bieraści, dzie pradstaŭniki hramadzkaści paśla šče i ŭručyli petycyju pratestu ŭ rasiejskaje konsulstva.
Ciapier u vialikich masavych akcyjach budzie zrobleny pierapynak da viasny. Ale jasna, kali ŭ śniežni damova ŭsio ž budzie padpisvacca, dyk ludzi sami vyjduć na vulicy, kab zaśviedčyć svoj pratest.
A što da zaplanavanych akcyjaŭ, dyk staršynia BNF Vincuk Viačorka zajaviŭ, što ŭžo chutka budzie raspačataja padrychtoŭka da paŭnavartasnaha «Maršu Svabody-2», jaki projdzie ŭviesnu 2000 hodu.
Alaksiej Šydłoŭski
