BT vačyma biełarusa
TUMANNYJA PERSPEKTYVY BT-2
Pry žadańni narmalnuju historyju možna znajści i ŭ Lelčycach. «Naš kraj» raspavioŭ u svajoj prahramie pra staražytnyja miascovyja padańni, pra panski majontak i sprobu miascovaj biadnoty jaho zachapić u revalucyjny čas. Pra toje, što pa zaćviardžeńni savietaŭ žychary Lelčycaŭ «chto padaŭsia ŭ Polšču, a chto da vojskaŭ Bułak-Bałachoviča». Jak u 38-m carkvu razabrali, a ŭ 92-m pačali adbudoŭvać. Zvyčajnaja historyja nia nadta histaryčnaha biełaruskaha miastečka — prynamsi dla žycharoŭ padobnych miastečak davoli cikavaja.
«Krok-2» zrabiŭ vialiki pramoŭšn «Biełaruskaj muzyčnaj alternatyvie» ŭ Internecie; piatničny vypusk «Dobraj ranicy» mieŭ u haściach muzykaŭ z «Ekivokaŭ» i «Exist»-u. Usio było super, bo «Ekzysty» — chłopcy našyja, i siužetaŭ chapała, i zastaŭki aryhinalnyja zrabili, ale... Spačatku zarubili pamidoraŭski «Cud na Kalady» i prymusili chvilinu nazirać hadzińnik pierad navinami ATN. Potym užo sami dabraranišniki pakazali niejki niezavieršany j tamu mała zrazumiety siužet pra «Śviaty Viečar-2000», a lubyja adkazy viadučy svaimi kamentarami zvodziŭ na temu prychilnic, a prajekt «Śviaty Viečar» abazvaŭ «ci kvartetam, ci sekstetam». Cieraz heta samym kanceptualnym momantam prahramy staŭsia klip «Kryvi» «Za tumanam».
Za tym ža tumanam pakul i stvareńnie druhoha nacyjanalnaha kanału. Hrošaj nie staje j na adzin; na BT kažuć, što, kali zrobiać usio ž novy kanał, dyk prosta ŭsie na jaho piarojduć. Hrošy praściej znachodzić pad volny pryvatny prajekt — ale nia z našym ža investycyjnym klimatam... A dobra było b, kab pierakryli ORT razam z «našym Paŭłam Šaramietam», «našymi sałdatami ŭ Čačenii» i «našymi palitykami ŭ Dumie». I tady ŭklučaješ televizar, a tam zamiest «našaha» Jakuboviča jaki-niebudź biełaruski siamiejny telekanał «Na chvali ŭzajemaparazumieńnia»... Super!
Arciom Łukjanovič
