BT vačyma biełarusa
FAKty, albo słavianie ŭ teleskryni
Subota. Viečar. Hladžu niejki amerykanski tryler. Reklama. Rablu ahlad inšych kanałaŭ. Uvahu pryciahvaje kanał z ptušačkaj u levym vierchnim kutku. U kadry telefon, a pa-za kadram hołas. Hołas razdražniona i sa stracham viaščaje pra niejkich niedavumkaŭ, jakich nielha dapuskać da teleefiru. Jany, na dumku hołasu, za paŭtary chviliny (!) akramia fraz «Žyvie Biełaruś» i «Svobodu politzaklučionnym!» ničoha skazać nia zmohuć.
Mianiajecca kadar. Na ekranie haspadar hołasu. Akazvajecca, heta «Azijatka», chacia na vid i słavianin. Dy jašče nie aby-jaki. Bo viaščaje na movie samych hałoŭnych słavian, chacia i ź miascovym akcentam.
Pužaje dalej. Akazvajecca, što hetych niedavumkaŭ nielha dapuskać da efiru jašče j tamu, što jany prydumali, byccam paŭmiljona tutejšych ludziej z pryčyny ciažkaha ekanamičnaha stanu krainy źbirajucca źbiehčy ŭ emihracyju. A hetaha nia moža być, śćviardžaje viadučy, bo pravierana vielmi kampetentnymi słužbami. I z ekanomikaj poŭny paradak.
U dumcy zhadžajusia ź im. Adkul voźmiecca stolki emihrantaŭ, kali 80% nasielnictva — žabraki? U mianie samoha zastałasia para socień. A dzie ž hrošy na kvitok na samalot, ciahnik, aŭtobus? Na ŭładkavańnie ŭ inšym miescy: žyllo, charčavańnie, na doktara?
Mianiajecca kadar. Da viadučaha padklučajecca jašče adzin słavianin. Nazyvajecca deputatam. Jon aburany tym, što hetyja samyja niedavumki patrabujuć teleefiru jašče j tamu, što jany ŭpeŭnieny, što pradstaŭlajuć značnuju častku nasielnictva krainy. A hetaha nia moža być, bo jany, deputaty, vybranyja narodam, pradstaŭlajuć bolšaść nasielnictva.
Voś z hetym ja ŭžo nie pahadžajusia. Z taje pary, jak u 1996 hodzie Łukašenka razahnaŭ parlament, nikoha my bolš nie vybirali. A tyja, kaho jon nabraŭ u svaju «pałatku», adnaho jaho i pradstaŭlajuć.
Mianiajecca kadar. U kadry viadučy z žachlivym vyrazam tvaru. Hety žach pieradajecca i mnie. Raptam uspaminaju, što, mabyć, skončyłasia reklama. Pieraklučajusia na kanał z amerykanskim tryleram. I z ekranu znoŭ syplecca, pierakładzienaja na movu «starejšaha słavianskaha brata» fuck you!, fuck you! A moža sapraŭdy, Azijatka?
A.Hryhorjeŭ, Miensk