Mecenat pahromščykaŭ nosić vyšyvanuju kašulu
U Śvietłahorsku sud. Sudziać Anatola Silivončyka, čałavieka, jaki ŭ svoj čas finansavaŭ vyrab kopii nacyjanalnaj śviatyni Biełarusi, kryža Eŭfrasińni Połackaj, jaki nabyŭ na ŭłasnyja srodki aŭtobus, kab jahonyja ziemlaki mahli biez turbotaŭ dajaždžać da rajcentru.
Za kratami na łavie padsudnych A.Silivončyk siadzić adzin. Ni kamandzira atradu «bierkutaŭcaŭ» z Surhutu, ni namieśnikaŭ i kamisaraŭ nie vidać i nie čuvać. Silivončyka sudziać za toje, što jon finansavaŭ pajezdku «Bierkuta» ŭ Biełaruś i prysutničaŭ pry «zachopie vioski Mikałajeŭki», pra što my pisali letaś u lipieni.
Sudziać mecenata. Adrazu ŭźnikaje pytańnie: čamu na łavie niama darosłych kamandziraŭ atradu niepaŭnahadovych rasiejskich pahromščykaŭ, tych, chto niepasredna addavaŭ zahady padletkam kidać ludziej tvarami ŭ ziamlu, zahaniać pad stoł, źbivać, viazać, stralać chałastymi nabojami z bajavoj zbroi, raskidvać vybuchovyja pakiety? Mo tamu, što tyja — paŭnavartasnyja hramadzianie Rasiei, a Silivončyk — svoj, biełarus? Čamu niama na hetaj łavie i tych, chto davaŭ dazvoł na praviadzieńnie «vučeńniaŭ», chto prapuściŭ praź miažu na biełaruskuju ziamlu ŭzbrojeny atrad?
Adzin z artykułaŭ kryminalnaha kodeksu, pa jakim sudziać Silivončyka, — pazbaŭleńnie hramadzianaŭ voli z pryčynieńniem im fizyčnych pakutaŭ. A taksama — złosnaje chulihanstva i supraciŭ rabotnikam milicyi pry vykanańni apošnimi słužbovych abaviazkaŭ.
Na siońniašni dzień apytanyja 14 paciarpiełych. Usiaho treba apytać 19 paciarpiełych i 52 śviedki. U jakaści śviedkaŭ čakajecca pryjezd asobaŭ z kiraŭnictva surhuckaha «Bierkuta» — udzielnikaŭ padziejaŭ u Mikałajeŭcy. Vyklikany pozvami taksama kiraŭniki Śvietłahorskaha rajvykankamu.
U sud pryjšło niamała listoŭ z prośbami ab apraŭdańni Silivončyka. U pryvatnaści, jość takija listy ad MHA «Kryž Śviatoj Eŭfrasińni Połackaj», dzie za prezydenta A.Silivončyk, ad RPC, «Bajavoha braterstva», Sajuzu frantavych siabrovak, hramadzkich arhanizacyjaŭ Surhutu, dački maršała Žukava i inšych asobaŭ.
Na sudzie 21 lutaha prysutničaŭ konsuł Rasiei U.Trutnieŭ.
Ździŭlaje aśviatleńnie pracesu rasiejskaj televizijaj. Vielmi ŭžo ich repartažy nahadvajuć BT. Vodhuki ludziej na praces i asobu padsudnaha nehatyŭnyja, kali pakazvajuć samoha Silivončyka, dyk tolki ŭ čas łajanki sa śviedkami, sudździami, prakurorami.
Nielha nie adznačyć, što pavodziny Silivončyka pad čas sudovaha pracesu nie vyklikajuć sympatyjaŭ ni ŭ neŭtralnych naziralnikaŭ, ni ŭ zaanhažavanych žurnalistaŭ. Pieršyja paraŭnoŭvajuć hetyja pavodziny z manierami rasiejskaha ultranacyjanalista Žyrynoŭskaha, a druhija navat kažuć, što ŭ asobnych epizodach Žyrynoŭski — prosta anioł proci Silivončyka. Hety abzyvaje ŭsich biełarusaŭ svałačami, sudździaŭ aviečkami. Pahražaje paciarpiełym, što dajuć pakazańni suprać jaho, raspravaj. Kaža, što tolki adzin jon tut sapraŭdny biełarus, bo nosić biełaruskuju vyšyvanuju kašulu, a Łukašenka takoj nia nosić.
Sud tolki raspačaŭsia i adkładzieny da 28 lutaha. Usie ŭdzielniki pracesu — śvietłahorcy. Staršynstvuje Nadzieja Ramanava — staršynia śvietłahorskaha sudu, abvinavaŭca — prakuror Siarhiej Kułažanka, abaronca — śvietłahorskaja advakatka Tamara Vinahradava. Spadziajemsia, što prysud budzie spraviadlivym.
Sumna tolki toje, što čałaviek, jaki tak šmat dobraha zrabiŭ dla Biełarusi i dla svaich ziemlakoŭ, pryvioŭ da siabie na Radzimu rasiejskich pahromščykaŭ z fašysckaj psychalohijaj dy metadami dziejańniaŭ i hetym samym, a taksama małaprystojnymi pavodzinami pad čas sudovaha pracesu sapsavaŭ svajo dobraje imia ŭ vačach ziemlakoŭ.
Vadzim Bołbas, Śvietłahorsk
