Vystava, štohod usio bolš padpolnaja
Štohod supołka mastakoŭ “Pahonia” ŭ Pałacy mastactvaŭ ładziła svaje vystavy, pryśviečanyja Dniu Voli. Sioleta, jak i letaś, ułady nie dazvolili pakazu tvoraŭ da 25 sakavika. Pryčyna — palityka.
Vystava ŭsio ž adbudziecca ŭ Pałacy mastactvaŭ, ale tolki 14 krasavika (zahadzia anansavany pačatak a 17-j). A pakul nievialičkaja častka ekspazycyi reprezentavanaja ŭ siadzibie Biełaruskaha Narodnaha Frontu “Adradžeńnie” (Varvašeni 8). 22 sakavika adbyłosia adkryćcio z udziełam mastakoŭ Alaksieja Maračkina, Viktara Markaŭca, Alesia Puškina i Alesia Šaternika. Alaksiej Maračkin byŭ u humory j bolš havaryŭ pra toje, što budzie: “Tut zbolšaha tvory minułych hadoŭ, a ŭ Pałacy mastactvaŭ nas čakaje šmat siurpryzaŭ”. U siadzibie BNF vystaŭlenyja partrety Stefanii Staniuty, Ryhora Baradulina, Vasila Bykava raboty S.Tkačenki, krajavidy A.Maračkina, U.Hryckieviča, A.Šaternika (abudžalny nastroj jahonaha pejzažu “Sakavik” asabliva aktualny), U.Vasiuka. Asobna staić praca Jurja Piskuna — partret Ivonki Surviłły na tle biarozak (dobry abraz, tolki niezrazumieła, čamu na tle biarozak i čamu spadarynia Surviłła hetak padobnaja, pavodle zaŭvah šmatlikich hledačoŭ, da tavaryša Krupskaj?). Klasyčnaje abličča biełarusa-zmahara paŭstaje ŭ Uładzimieru Prakuleviču — udzielniku Słuckaha zbrojnaha čynu 1920 hodu: dziadźka Ŭładź uzirajecca ŭ pryšłaść, a pa-nad im praz chmary rviecca sonca. Varta lišniaha razu zhadać miaściny, źviazanyja z abviaščeńniem niezaležnaści Biełarusi ŭ 1918 hodzie, ale dziela taho nie abaviazkova iści da domu na kolišniaj Sierpuchaŭskaj (ciapier Vaładarskaj — jak šmat źviazana z hetaj vułkaj!), dzie prymałasia III Ustaŭnaja hramata Rady BNR, ci da placu Voli, dzie ŭ Domie hubernatara peŭny čas mieściŭsia Narodny sakrataryjat Biełarusi — varta zirnuć na dva hrafičnyja tvory Viktara Staščaniuka, u jakich z dakładnaściaj da drabnicaŭ adnoŭleny vyhlad tych budynkaŭ i duch času.
Biezumoŭnym “hitom” vystavy staŭsia “Miron” A.Maračkina: čałaviek śpinaju da hledača viešaje na vysakavoltnych linijach, što mihajucca razradami, naš ściah. Pobač radki Ryhora Baradulina: “Dryžecie i kałchozny tron, i padchalimskija kapeły, kali vyviešvaje Miron ściah rodny bieł-čyrvona-bieły”.
Abiacaŭ paciešyć “hitom” i słavuty Aleś Puškin, ale trochi paźniej — na vystavie ŭ Pałacy mastactvaŭ. Kazaŭ, što pryviazie pałatno 2,7 na 2 metry j zładzić perfomans na try chviliny. Sp.Puškin navat apisaŭ svoj hrandyjozny abraz: “Na tle zimovaha krajavidu — zdań, rečka, palaŭničyja łoviać aleniaŭ i dzikoŭ, babulki źbirajuć hallo. Zdań raspaścierłasia pa-nad usim krajavidam: praź jaje vidny cerkvy, damki, ludzi. Zdań pałaje. Unizie pažarnyja sprabujuć jaje patušyć, tamsama jaje blakujuć ludzi ŭ paŭsferach, z dubinkami j ščytami — jany mitusiacca, jak lilipuciki…” Jak heta vyhladaje — pabačym na vystavie 14 krasavika.
Viktar Muchin
