SŁAVIANARASIZM
20 sakavika ŭ Biełaruski Hielsynski Kamitet źviarnułasia žycharka Barysava Anastasija Arasłanava sa skarhaju na praciahłaje ckavańnie jaje muža — Sałavata Arasłanava: «Paśla aktaŭ teraryzmu ŭ Maskvie kožny milicyjant ličyć za abaviazak spynić muža (jon baškir), spraŭdzić dakumenty, abšukać, abrazić, prynizić. Niaredka supracoŭniki milicyi kažuć jamu, što nienavidziać usich niaruskich». 23 listapada 1999 hodu Sałavat Arasłanaŭ byŭ zatrymany milicejskim naradam u pary krokaŭ ad domu. Supracoŭniki milicyi zapatrabavali ŭ jaho dakumenty, sp. Arasłanaŭ pakazaŭ paśviedčańnie veterana aŭhanskaje vajny. Milicyjanty pačali naśmichacca ź jaho, potym zaciahnuli na prachadnuju zavodu biezalkaholnych vyrabaŭ, dzie abšukali i žorstka źbili. U rečach Arasłanava była znojdzienaja suvenirnaja siakierka, ź jakoju jon jeździŭ źbivać naledź ź dźviarej lecišča. Hetaja siakierka zusim raźjušyła milicyjantaŭ.
Sp. Arasłanaŭ pachavaŭ u krasaviku 1998 hodu syna-aficera, z taje nahody mocna absunuŭsia i pastareŭ. Zdało serca. Adnak pavodle śviedčańniaŭ troch supracoŭnikaŭ milicyi, jon na ich napaŭ i pabiŭ. Sam Arasłanaŭ śćviardžaje, što troje maładych milicyjantaŭ bili jaho, jak vieźli na ekspertyzu, bili pa darozie ŭ pastarunak. Tydzień paśla aryštu Arasłanaŭ lažaŭ płastom u KPZ Barysaŭskaha HAŬS, bo ŭ jaho pałamanyja skaby, adbityja nyrki, i nohi nia chodziać. Daremna žonka patrabavała medyčnaha ahladu. Daremna źviartałasia da prakurora, śledčaha, milicejskich čynoŭ. U adkaz jaje paprasili bolej nie pisać, a ŭzamien, maŭlaŭ, vypuściać muža.
Za S.Arasłanava chadajničała kiraŭnictva Biełaruskaha Źviazu Veteranaŭ aŭhanskaj vajny, a taksama haradzkoha centru techničnaje tvorčaści junactva, dzie jon pracuje. Marna. Čałaviek dasiul siadzić u SIZA.
Fašyzm — trasca, jakaja trasie ŭsie słai hramadztva, asabliva małaadukavanyja j ciomnyja. Pavodle fašysckaje idealohii, ludzi raździalajucca na Ubermensch'aŭ i Untermensch'aŭ — zvyščałaviekaŭ i niedačałaviekaŭ. U našym vypadku z radyjo j televizii, z hazetnych publikacyjaŭ i čynavienskich vystupaŭ možna ŭviedać pra niejkuju asablivuju misiju słavianaŭ, pra ichnuju niebyvałuju maralnuju čyściniu i «padźvižnictva». Hetyja ŭschvaleńni słavianskich cnotaŭ majuć na mecie manipulacyju masavaj śviadomaściu. Zachvalenyja liślivaju chłuśnioju, ludzi kinucca na «čarnažopych», «žydoŭ», «pradažnych biełaruskich nacyjanalistaŭ» i zabuducca na svaje prablemy.
Śviatłana Kurs
