pazytyvy
Narodny haryzont
Praz try miesiacy paśla taho, jak była zroblena pieršaja fatahrafija, u ciomnych kutach paryskich restaracyjaŭ užo pradavalisia parnahrafičnyja zdymki.
Toje samaje zdaryłasia i z kino. Nie paśpieŭ ździŭleny śviet biasškodna paciešycca vynachodnictvam bratoŭ Lumjer, jak jano było abvieščanaje hałoŭnym z mastactvaŭ suśvietnaj praletarskaj revalucyi.
Što ž kazać, šanoŭnyja, pra televizar, kali jon sam saboju revalucyja. Paŭtysiačy hadoŭ spatrebiłasia hadzińniku, kab z upryhožańnia ratušnaj viežy pieratvarycca ŭ reč zvyčajnuju, jak łyžka. A skrynia z "vaknom u śviet" pralacieła henym šlacham pry žyćci siaredniaha biełarusa.
Toj, siaredni, śviet Božy ŭbačyŭ praz akienca rodnaj chaty. Voś i siadzić štodnia, utaropiŭšysia ŭ šklanoje voka televizaru, praź jakoje čužy jamu śviet hladzić u jahonaje žytło, u dušu, u śviadomaść dziaciej. U Biełarusi pieršymi hetaje ŭciamili reklamščyki, potym palityki. Pajšło užo druhoje dziesiacihodździe zaciataha zmahańnia za efirny čas.
Ale jak nia budzie televizara ŭ kožnaj chacie, baraćba taja stracić sens. Pahroza realnaja, bo 37% televizaraŭ u biełaruskich siemjach ekspluatujecca bolš za dziesiać hadoŭ. Vytvorčaść u krainie tym časam skaraciłasia ŭdvaja. Zaraz svaich pradajecca “praz pradpryjemstvy handlu” niašmat bolej za impartovyja. Dy j naahuł ad pačatku hetaha hodu aficyjnym handlem ŭ krainie pradadziena try čverci televizaraŭ ad letašniaj ličby. Što budzie z narodnym televizaram?
Pakolki pieravažnaja bolšaść čytačoŭ «Našaj Nivy» kuplaje i hladzić televizary, a nie vyrablaje ich, nia varta raźbiracca, jak pracuje biełaruski zavod z rasiejskaj nazvaj «Horizont». Dziela razborak ź im isnujuć tyja, jakija prymusiać zrabić patrebnuju dyjahanal.
Dziakuj bohu, aproč ich jość tałkovyja specyjalisty i pracavityja rabočyja. Ichnymi namahańniami mienskija handlovyja marki trymajucca na rynku, asabliva ŭ byłym SSSR. Paćvierdžańnie tamu vyniki daśledavańniaŭ niezaležnaha centru “Ramir”. Sacyjolahi hetaj ustanovy apytali ŭ 18 rasiejskich haradoch 800 čałaviek va ŭzroście 18 i bolej hadoŭ.
Sacyjolahi prasili ludziej pryhadać viadomyja im marki televizaraŭ. Apytanyja najčaściej zhadvali 16 marak, pryčym mienskija aparaty zaniali zusim niakiepski šosty radok, a viciebskija zamykali rejtynh.
Pa vynikach daśledavańnia dobra vidać lideraŭ rynku, abjekty rasiejskaj mary: Sony, Panasonic i Samsung. Ale ž adna reč – viedać, inšaja – mieć, a treciaja – maryć. Dyk akazvajecca, što najčaściej (15%) na lepšym miescy ŭ rasiejskaj chacie staić karejski Samsung.
Marka 1 2
Sony 65 2,50
Panasonic 59 1,50
Samsung 45 0,87
LG 25 1,13
Philips 21 1,25
Haryzont 17 0,13
Rekord 13 0,40
Funai 12 0,20
Sharp 10 0,40
Rubin 9 0,40
1) spantannaje viedańnie marki, u % ad kolkaści apytanych
2) Adnosiny kolkaści tych, chto choča nabyć peŭnuju marku, da kolkaści tych, chto jaje ŭžo maje
Padobna, što Philips, Sharp i «Rubin» zrobiać nam hruntoŭnuju kankurencyju na samym niestabilnym u śviecie rynku nastupnaha dziesiacihodździa. Bo cana adnaho našaha ekspartavanaha televizara skaraciłasia sa 166$ u 1998 h. da 131$ u 1999 h., u toj čas jak aficyjna impartavanyja z-za miežaŭ Sadružnaści i Sajuza patańnieli z 493 da 363 USD.
Jość niebiaśpieka, što ŭ 2001 hodzie častka elektaratu moža nia ŭbačyć žyvoj tranślacyi. A moža henak lepiej budzie?
Michał Zaleski
