Naviny
Pierachod u Bruzhach zakryvajecca
Z inicyjatyvy Polščy z 1 žniŭnia na try miesiacy budzie zusim zakryty pamiežny pierachod «Kuźnica—Bruzhi» na biełaruska-polskaj miažy pad Horadniaj. Palaki majuć rekanstrujavać jahonuju polskuju častku. Pad hety čas usia nahruzka prypadzie na pierachod «Bierastavica—Babroŭniki», piša BiełaPAN. U 2000 hodzie Eŭrasajuz daŭ Polščy hrošy na rekanstrukcyju pierachodu. Razam z tym Brusel admoviŭ Biełarusi ŭ dapamozie na praviadzieńnie takich sama pracaŭ na jejnaj terytoryi.
BNF za pieranos Usiebiełaruskaha źjezdu na vosień
13 traŭnia prajšoŭ Sojm BNF. Vincuk Viačorka na im nadta chvaliŭ viesnavyja akcyi apazycyi, jakija, jak jon skazaŭ, pazbavili ŭłady taho arhumentu, što idei niezaležnaści ŭ Biełarusi padtrymlivajucca tolki «kučkaj admarozkaŭ». Skazaŭ jon taksama, što, dziakujučy mienskim pratestam, źmianiłasia i staŭleńnie da biełaruskaj prablemy na Zachadzie, u pryvatnaści, kanhres ZŠA ŭpieršyniu zapatrabavaŭ ad Rasiei admovicca ad padtrymki Łukašenki.
Na Sojmie abmiarkoŭvali taksama budučy Ŭsiebiełaruski źjezd. Jury Chadyka adznačyŭ, što takoje važnaje mierapryjemstva patrabuje hruntoŭnaj padrychtoŭki, a tamu prapanavaŭ uletku pravieści pašyranaje pasiedžańnie arhkamitetu źjezdu, a sam źjezd — niedzie napačatku vosieni. Takuju zajavu j pryniali.
B.T.
Niama spakoju Suvoravu
Jakraz napiaredadni Śviata Pieramohi niechta zapeckaŭ rudoju farbaj naviusieńki biust Suvorava ŭ Viciebsku. Tolki-tolki hety biust pastavili kala vajenkamatu na toj samy pastament, adkul paŭtary hady tamu byŭ źnik jahony papiarednik «Suvoraŭ-1».
Viciebskija dziaržaŭnyja hazety šyroka spaviaščali, što novy «Suvoraŭ-2» ź jakasnaha betonu dy vahoju ŭ 315 kh byŭ zrobleny na hrošy, sabranyja rabotnikami taho samaha vajenkamatu. Ale ŭ horadzie chodziać čutki, što ŭ ich znajšoŭsia sponsar, jaki daŭ na Suvaorava hrošy, kab «adkasić»ad vojska… Va ŭsialakim vypadku, admyvali «Suvorava-2» sapraŭdy supracoŭniki vajenkamatu. Dy razvažali, ci nie ŭstalavać kala Suvorava jaki «Post №1» z adbornych vajskoŭcaŭ abo pryhožych milicyjantaŭ u plamista-błakitnaj formie.
A.T., Viciebsk
Śviečki ŭ pamiać movy
U Mahilovie adbyłasia akcyja, pryśviečanaja hadavinie «moŭnaha» referendumu 1995 hodu. Aktyvisty maładziovych arhanizacyjaŭ pastavili śviečki pamiaci la memaryjalnaj doški Śpirydonu Sobalu.
Mazuryk Mazurek
Žurnalista hazety «Nove państva» Roberta Mazureka, jaki naviedvaŭ Škłoŭ, zatrymali pobač z domam, dzie žyvie žonka Łukašenki Halina Radzivonaŭna. Heta ŭžo tradycyjnaje miesca zatrymańnia zamiežnych hramadzianaŭ. Usie jany chočuć pahladzieć na horad, jaki ličycca radzimaj Alaksandra Łukašenki, i na žytło pieršaj biełaruskaj ledzi, jakaja praciahvaje žyć u Škłovie. Mazureka patrymali dźvie hadziny ŭ pastarunku i adpuścili.
Symon Hłazštejn, Mahiloŭ
Pomnik Karvatu ŭ Bieraści
5 traŭnia adkryli ŭ Bieraści pomnik lotčyku Karvatu, chto jość pieršym Hierojem Respubliki Biełaruś paśmiarotna. Jon zahinuŭ, advodziačy ad vioski pad Baranavičami samalot, što padaŭ. Karvat vyhadavaŭsia ŭ bieraściejskaj škole numar 8, jakoj ciapier nadali jahonaje imia. Jahonaha ž imia jość vulicy ŭ Miensku j Bieraści.
Siaržuk Prudnikaŭ, Bieraście
TBM pikietuje
Viciebskaja haradzkaja rada TBM naładziła 13 traŭnia pikiet da piatych uhodkaŭ referendumu ab movie. 10 pikietoŭcaŭ vyrašyli ŭskałychnuć horad, dzie z 3027 pieršaklaśnikaŭ usiaho 43 navučajucca pa-biełarusku. Adstojali dźvie hadziny dy nasłuchalisia ad ziemlakoŭ usiaho — ad ščyrych słovaŭ padtrymki da adkrytych pahrozaŭ.
A 14 traŭnia taja ž haradzkaja rada TBM razam ź litaraturnym muzejem va ŭračystaj abstanoŭcy padvodzili vyniki abłasnoha dziciačaha konkursu «Nie pakidajcie ž movy našaj biełaruskaj». Dziela junych litarataraŭ, mastakoŭ dy publicystaŭ darosłyja siabry TBM praviali ekskursiju pa horadzie, a paśla dzietki hladzieli pastanoŭku pavodle Karatkievičavaj «Ładździ rospačy».
A.T., Viciebsk
Pramenad na pantonach
Jašče pazaletaś u Navapołacku na Dźvinie źbiralisia pačać ramont adzinaha ŭ horadzie avaryjnaha mosta. Ale z-za braku hrošaj raboty nia raz pieranosili. Tolki naprykancy minułaha hodu most narešcie začynili. Adnak niaciažka ŭjavić, kolki z-za hetaha paŭstała prablemaŭ. Asabliva ŭskładniłasia žyćcio ŭ žycharoŭ pasiołku Baravucha, jaki letaś staŭ častkaju horadu. Žycharoŭ Baravuchi transpart davoziŭ tolki da bierahu Dźviny, dalej pieššu tre było pierajści most i pierasieści na inšy haradzki aŭtobus. Prablema jašče bolš abvastryłasia, kali ŭ krasaviku z mosta źniali achoŭnuju aharodžu: ciapier pa im mahli prajści tolki kaskadery.
Dapamahli specyjalisty čyhunačynych vojskaŭ. U ścisłyja terminy jany naładzili pantonnuju pierapravu. Pry kancy krasavika pieršyja achvotnyja pierajšli na levy bierah raki metalovym płyvučym mostam. Niečakana novaja kamunikacyjnaja arteryja stałasia ŭlubionym miescam dla špacyraŭ. Mašyny pa pantonie prajaždžajuć u ekstranych sytuacyjach — chutkaja dapamoha, pažarnyja abo milicyja. Zatoje ludzi iduć bieśpierapynna, asabliva ŭ vychodnyja.
Vasil Krokva, Połacak
Kormiać bydła raz na try dni
Na pradpryjemstvie «Paŭdniovaje», što ŭ vioscy Vulka-Haradziščanskaja la Pinsku, štodzień zdychaje niekalki dziasiatkaŭ śviniej z-za niedachopu karmoŭ.
Hetaje pradpryjemstva ŭ svoj čas ličyłasia amal što ŭzornym. Mahutnaści jaho raźličanyja bolš čym na 50 tysiačaŭ hałovaŭ. Ciapier ža ahulnaje pahałoŭje śviniej na «Paŭdniovym» — krychu bolš za 30 tysiačaŭ. Ciapier pradpryjemstva maje mienš za pałovu ad nieabchodnaj kolkaści karmoŭ, tamu śviniej kormiać tolki raz na try dni. U vyniku za pieršyja try miesiacy biahučaha hodu ad hoładu pamiorła bolš za 1600 śviniej. Sytuacyja budzie paharšacca, bo karmoŭ niama dzie ŭziać. Analahičnaja sytuacyja skłałasia i na śvinahadoŭčym kompleksie ŭ vioscy Płotnica, što na susiedniaj Stolinščynie (u mižreččy Prypiaci i Styra, taja, što pry kancy ChVIII st. kartki čas była centram Pinska-Zarečnienskaha pavietu).
Heta sapraŭdny kryzys u ajčynnaj žyviołahadoŭli. Karotkaterminovuju vyhadu ad hetaha majuć chiba što miasapierapracoŭčyja pradpryjemstvy. Adnak cikava, što na Pinskim miasakambinacie miasa z «Paŭdniovaha» amal nie atrymlivajuć — tam śviniej adrazu kuplajuć kamercyjnyja struktury pa bolš vysokich cenach. «My narychtoŭvajem syravinu zbolšaha ŭ Łuninieckim i Stolinskim rajonach, dzie ŭ kałhasach taksama koluć śvińni, ale kamercyjnyja struktury ŭ ich miasa kuplać nia chočuć z-za značnaj radyjacyjnaj zabrudžanaści», — paviedamili ŭ administracyi Pinskaha miasakambinatu.
Alaksiej Dzikavicki, Pinsk
Zabaranili paetyčnyja čytańni
Tradycyjnyja paetyčnyja čytańni, što pravodziacca ŭviesnu maładziovaj frakcyjaj BSDP (Narodnaja Hramada), na hety raz nie adbylisia, bo Mienharvykankam zamiest zapytanaha miesca ŭ skvery Janki Kupały prapanavaŭ arhanizataram pieranieści mierapryjemstva na pł.Banhałor. Arhanizatary ŭsio ž miarkujuć pravieści kala pomnika Janku Kupału adno čytańnie. Uvohule ž akcyja zadumvałasia jak seryjnaja: heta musili być «Try kroki viasny». Pieršy krok pad nazovam «Našy kryły» nia ŭdaŭsia, mo atrymajecca nastupny.
Dušać «Pahoniu»
Na dniach było vyniesiena druhoje papiaredžańnie haradzienskaj hazecie «Pahonia». Redakcyja vydańnia abvinavačvajecca ŭ tym, što drukuje na svaich staronkach abjavy niezarehistravanych arhanizacyjaŭ. Razam z uładami na hazetu cisnuć i miascovyja fašysty. Redaktar hazety Mikoła Markievič atrymaŭ u svoj adras pahrozy ad haradzienskaha RNIE: nieviadomyja pahražali «dabracca» da siamji žurnalista, kali jašče raz na staronkach vydańnia budzie źmiaščacca infarmacyja, jakaja abražaje RNIE.
KHB biarecca za studentaŭ
Na minułym tydni pierad navučencami Aršanskaha mechanika-technalahičnaha technikumu vystupiŭ supracoŭnik KHB Siarhiej Maciuchin, jaki raspavioŭ prysutnym pra niebiaśpieku ŭdziełu ŭ niaŭradavych arhanizacyjach, takich, jak Zadzinočańnie Biełaruskich Studentaŭ, Małady Front, «Źviaz», pahražaŭ źnižeńniem adznak na ekzamenach siabram NDA. Pry kancy sustrečy Maciuchin pakinuŭ usim numary telefonaŭ, pa jakich studenty mohuć źviartacca, i paraiŭ nie «zajmacca duraściami». Supracoŭnik KHB, miarkuje ŭ svaim biuleteni Biełaruskaja Asacyjacyja Resursavych Centraŭ, tak adreahavaŭ na aktyvizacyju dziejnaści niaŭradavych arhanizacyjaŭ u Voršy, uzbujnieńnie maładziovaha adradženskaha ruchu, razvał BPSM u najbujniejšym technikumie horadu pad upłyvam miascovaj supołki ZBS.
B.T.
