Naviny
Nastaŭniki hulajuć biaz hrošaj
Mahiloŭskija nastaŭniki pajšli na leta ŭ adpačynak biez zarobku abo tolki z častkaj adpusknych. U biudžecie niama hrošaj. Ahulnaja suma zapazyčanaści pa zarpłatach na Mahiloŭščynie pie-ravysiła 2,5 miljardy rubloŭ.
Symon Hłazštejn, Mahiloŭ
Lekaraŭ brakuje
Na Cmarhonščynie brakuje 26 daktaroŭ i 33 siarednich medyčnych rabotnikaŭ. Z pryčyny ich adsutnaści ŭ vioskach rajonu nie pracujuć 4 FAPy. U struktury vydatkaŭ medycyny mizernaja zarpłata lekaraŭ składaje 50%, 15% idzie na zakupku medykamentaŭ, 11% — na charčavańnie dla chvorych. Košt adnaho łožka-dnia siońnia składaje 1057 rubloŭ. Kab niejkim čynam papravić materyjalny stan, štohod na miesiac zakryvajucca čatyry ŭčastkovyja lakarni rajonu, a persanał adpraŭlajecca ŭ adpačynak.
Pałova mužykoŭ palić
Pavodle infarmacyi ajčynnaha Ministerstva achovy zdaroŭja palić amal pałova mužčynaŭ Biełarusi, pryčym u vieku ad 23 da 34 hetaja ličba dasiahaje 52%, ad 35 da 44 — 40%, dalej pad sivuju stałaść — jašče krychu mienš. Medyki miarkujuć, što ŭ moładzievych asiarodkach bolš-mienš rehularna spažyvajuć tytuń kala 70% junakoŭ i mužčynaŭ u vieku ad 15 da 23. Siarod žanočaj pałovy palić niedzie 5—7%.
Pavodle BARS
Jašče dva nie aścierahlisia
Studentaŭ Homielskaha ŭniversytetu Źmitra Karpienku i Źmitra Kumičova złaviła milicyja pad čas rasklejki ŭ horadzie ŭlotak, jakija vykryvali miascovaje čynavienstava, što hacić vielizarnyja hrošy ŭ ladovy pałac tady, kali ŭ tym ža mikrarajonie niama lakarni i nie dabudavanaja škoła. Maładych dastavili ŭ RAUS, na ich skłali pratakoł, a paśla im doŭha čytali natacyi.
Alen apraŭdany
Navapołackaha śpievaka Alena zatrymali, abvinavaciŭšy ŭ prodažu falšyvych dalaraŭ. Śpiavak sprabavaŭ zdać u abmienny punkt sto dalaraŭ — z tych jakraz, jakija jon zarabiŭ u svajoj niadaŭniaj pajezdcy ŭ Ameryku. Dziaŭčynie-bankircy dalary padalisia falšyvymi. Milicyja ž razabrałasia i pryznała hrošy sapraŭdnymi.
Śviata Božaha Cieła
Moža być, što sioletniaje šeście na śviata Božaha Cieła, jakoje kataliki ładziać štohod z 1992 hodu, nie adbudziecca. Zvyčajna pracesija išła ad kaścioła Śviatoha Rocha da Čyrvonaha kaścioła praspektam Skaryny, pryčym ruch transpartu ŭ apošnija hady nie pierakryvali. Sioleta kataliki dali zajaŭku ŭ harvykankam zahadzia, ale pakul administracyja zhody nie daje. Čynoŭniki spasyłajucca na Łukašenkaŭ dekret i nakiroŭvajuć u administracyju Łukašenki. Šeście sioleta musić adbycca ŭ niadzielu 25 červienia, ale pakul probaščy kaściołaŭ nia robiać u parafijach anijakich abjavaŭ.
2,7 čałavieki na miesca
Sioleta konkurs pry pastupleńni ŭ VNU składzie pryblizna 2,7 čałavieki na miesca, letaś było 2,5. Bo ciapier adzinaccatyja klasy skančajuć na siem tysiačaŭ padletkaŭ bolš, čym hod tamu. Uva ŭsich VNU uvodzicca praktyka acenki abituryjentaŭ pa šaścibalnaj systemie (2; 3; 3,5; 4; 4,5; 5). U najbolš prestyžnych universytetach medalisty nia miećmuć raniejšych ilhotaŭ.
Rost cenaŭ
Cana elektraenerhii vyrasła ŭdvaja. Haradzkija žychary, a taksama ŭładalniki dačaŭ i haražoŭ buduć płacić 7,2 rubli za kilavathadzinu, sielskim žycharam taryf składaje 5,2 rubli za kilavathadzinu.
Fest u Navahradku
Padrychtoŭka da festyvalu siaredniaviečnaj kultury, što adbudziecca 24—25 červienia ŭ Navahradku, u razhary. Na jaho majuć pryjechać 529 udzielnikaŭ z Łatvii, Litvy, Rasiei, Polščy. Siońnia majuć pačać budavać zamkavuju ścianu, jakuju buduć brać šturmam pad čas spabornictvaŭ rycary z roznych rycarskich klubaŭ. Na festyval taksama zaprošanyja i muzyčnyja hurty z Estonii, Rasiei, Polščy, Švecyi, što hrajuć siaredniaviečnuju muzyku. Bolš padrabiaznuju infarmacyju možna atrymać na Internet-sajcie www.festival.ot.infonet.by.
Pomnik Ahinskamu
U Maładečnie kala muzyčnaj vučelni chočuć pastavić pomnik Michału Kleafasu Ahinskamu, aŭtaru słynnaha palanezu. Hatovy ŭžo makiet, jaho aŭtaram — Valarjan Januškievič. Skulptura musić być zroblenaja z paliravanaj bronzy. Pytańnie zastajecca pra hrošy, na prajekt ahułam patrebnyja blizu 40 tys. dalaraŭ. Administracyja vučelni spadziajecca, što bolšuju častku prafinansuje vykankam, a častku składuć pryvatnyja achviaravańni.
Jahoraŭ balatujecca ŭ Čerykavie
Hienerał-pałkoŭnik U.Jahoraŭ, były kiraŭnik MUS i KHB, adzin ź lideraŭ niezaležnickaha kryła ŭ akružeńni Łukašenki, raspačaŭ pieradvybarčuju kampaniju. Vybraŭ jon sabie Čerykaŭski rajon. Jon vystupaje i prysutničaje na zborach, pasiedžańniach, naradach na roznych pradpryjemstvach i ŭ arhanizacyjach, ładzić asabistyja pryjomy haradžanaŭ, sustrakajecca z narodam, navat jeździć pa vioskach! Pad čas vizytu ŭ Vieramiejskaje laśnictva, jakoje słavicca fantastyčnym uzroŭniem radyjacyi, vysoki hość zastaŭsia zadavoleny rabotami pa stvareńni tutaka specyjalnych miescaŭ dla adpačynku ludziej.
Andrej Kuźmin, Kryčaŭ
Niamieckija atestaty — biełarusam
5 červienia referent u pytańniach kultury pasolstva Niamieččyny ŭručyŭ dyplomy viedańnia niamieckaj movy suśvietna pryznanaha ŭzoru 34 vypusknikam Mienskaha linhvistyčnaha kaledžu № 24 i škoły № 73. Kab atrymać ich, vučni musili vytrymać specyjalny składany ispyt. Dyplom paćviardžaje viedańnie niamieckaj movy i pryznajecca va ŭsim śviecie. Moŭny dyplom druhoha ŭzroŭniu daje mahčymaść navučańnia ŭ niamieckich VNU.
B.T.
