pazytyvy
Chleb u abmien na volu
Dla ekanamista ŭsie ludzi — spažyŭcy, častka jakich zajmajecca vytvorčaściu. Na ŭsio zroblenaje jość peŭny popyt. Na vysokija abcasy — niaŭstojlivy, a na chleb — amal niaźmienny. Jość popyt štučny, naprykład, na cacki-tamahočy ci pasłuhi prezydenta.
Na hod patrebna čałavieku prykładna tona ježy. Albo sam łavi, źbiraj, haduj, albo kuplaj. Heta, tak by mović, teoryja.
Kab ubačyć biełaruskuju praktyku vytvorčaści ježy, vaš karespandent, čałaviek vyklučna haradzki, nakiravaŭsia ŭ addalenyja rajony krainy. Sumnaje bačyŭ z vakon mašyny: pryhožyja dzieŭki łytki padarožnikam demanstrujuć, kałhasnyja statki pamienieli.
Ale jak dabraŭsia da miesca, u Miadzielski rajon, usio akazałasia nia tak zmročna. Škada, što siońniašni ŭzrovień demakratyi robić nieetyčnym paviedamleńnie, da kaho kankretna dabraŭsia, bo zadziaŭbuć dobrych ludziej. Ubačyŭ ža zvyčajnuju kapitalistyčnuju sielskuju haspadarku i haspadaroŭ, jakich vielmi nie zadavalniaje ŭpartaje vykarystańnie ŭ krainie ahrarnaj palityki KPSS.
U ich vielmi pryhožyja pali. Vidać, što budzie ŭradžaj niakiepski. U ich mnostva tłustych śvińniaŭ i vialikich karovaŭ. Jany majuć novyja haspadarčyja budynki i budujuć jašče. Sioleta, jak i letaś, u ich budzie dobraje siena. Jany zaraz hurtom pradajuć bulbu. Žyvuć sabie.
Kałhaśniki kraduć sadžancy ŭ ichnych sadach, truciać rybu ŭ sažałkach, padkošvajuć ichnuju kaniušynu i padzarablajuć u ich padzionna (nia rvacca ž viek razam z henymi durniami).
Jany nie złujuć na kałhaśnikaŭ. Kažuć, treba ratavać reštki sialanstva. Jany sami sialanie, a tamu razumiejuć, što žyć jak nabiažyć doŭha nie atrymlivajecca.
I tak užo da prorvy prypiorlisia leninskim šlacham. Pavodle racyjanalnych normaŭ spažyvańnia, raźličanych za časoŭ raźvitaha sacyjalizmu i charčovaj prahramy, kožny sacčałaviek mieŭsia źjeści za hod 170 kh bulby, 405 ł małaka i 82 kh miasa. H.zn. bulby charčovaj treba na Biełaruś 1700 tys.t, a h.zv. «sielskahaspadarčyja pradpryjemstvy» letaś atrymali 775 tys.t, ź jakich pałovu pahnaili potym za zimu. Hramadzianie tym časam nakapali 6716.0 tys.t.
Małaka treba na Biełaruś 4050 tys.t, a našyja bujnyja sacyjalistyčnyja haspadarki vydušyli sa svaich biezymiannych KRS 2800,4 tys.t. Tymčasam babulam ź dziadulami rahuli adździačyli za kłopat… Z ajčynnaj statystyki viadoma, što ŭva ŭsich katehoryjach haspadarak było zakuplena za hod małaka 2620,8 tys.t, što składaje 42% ad uzroŭniu 1990 hodu. Niezdarma maryć viarnucca tudy Hałoŭny Ahraryj: zakupi 6240 tys.t. małaka, i vybaraŭ nia treba: na rukach u pałac zaniasuć.
A dzie ŭziać miasa 820 tys.t, kali dziaržzakupki skłali 552 tys.t za 1999 hod? Heta ž 35% ad uzroŭniu 1990 h. Dzie-dzie — u vioscy. Tam jo ŭ ludziej.
Pamiatajecie, spračalisia, što hałoŭnaje — ściah bieł-čyrvona-bieły ci tannaja kiłbasa. Niama ni kiłbasy, ni ściaha. Volaj Baćkaŭščyny handlujuć ź pieršym-lepšym. A ŭsio čamu: ludziam ziamlu addać nielha, a pa 100 000 dalaraŭ štohod piorci ŭ kožny kałhas — možna, hrošy jość.
Inšaja reč, što popytu na ježu nie admieniš. Tamu ažyvie vioska, daj joj tolki volu. Mała sialan zastałosia, ale i tych, što jość, chopić. Vuń, z vyšejšaj sielskahaspadarčaj adukacyjaj bolš jak 100 000 čałaviek, a prosta razumnych dyk i nia źličyš.
Voś kab im volu chto daŭ…
Michał Zaleski
