Parnataŭcy
3-4 červienia ŭ Miensku adznačała dvaccatyja ŭhodki vypusku samaja nacyjanalistyčnaja klasa «parnatu»
«Parnatam» nazyvajuć Respublikanski internat pa muzycy j vyjaŭlenčym mastactvie imia I.Achremčyka. Dziakujučy arhanizacyjnym vysiłkam Andreja Radzijonava ŭ «Stałoŭcy» niepadalok ad penataŭ sabrałasia dobraja častka klasy j šeść nastaŭnikaŭ na čale z byłym dyrektaram «parnatu» Ratabylskim. Maryna Biezbarodava na sustreču pryjechała navat z Arenburhu.
Mnohija nacyjanalnyja inicyjatyvy 80-ch paŭstali z udziełam chłapcoŭ i dziaŭčat, što ŭ 70-ja vučylisia razam u hetaj klasie. Naprykład, rok-hurt «Bonda» niemahčyma ŭjavić bieź Ivana Markava j Siarhieja Knyša. Hetaksama ciažka ŭjavić «Majstroŭniu» i «Tałaku» biez udziełu Hienusia Łojki, Alesia Kostki, Andreja Radzijonava, Janki Miedźviadziova, Aleny Karavaj, Śviatłany Słuckaj. Pałova vypusknikoŭ klasy ŭdzielničała ŭ tałakoŭskich śpieŭkach i «kaladkach» i prajšła škaleńnie Łarysy Simakovič. Tamu śpiavajuć jany admysłova. Što paćvierdzili na červieńskaj sustrečy. Navat stvareńnie «Tutejšych» nie abyšłosia biez «parnataŭcaŭ»: u pieršy, nonkanfarmiscki skład supołki, jakaja napačatku nielehalna źbirałasia ŭ internacie Akademii navuk, uvachodzili Łojka j Kostka.
Perspektyŭnuju klasu prykmiecili ŭ svoj čas vykładčyki «parnatu». Mienavita joj vypaŭ honar udzielničać u «narodnym» prajekcie — mastackim azdableńni zbornika vieršaŭ Edzi Ahniaćviet «Doktar śmiech». Kniha pabačyła śviet u «Mastackaj litaratury» ŭ 1977 hodzie. U joj było źmieščana kala 30 malunkaŭ maładych «parnataŭcaŭ» — Aleny Karavaj, Ryty Rybačok, Aleny Zujevaj, Tani Chramiankovaj dy inšych. Tady pra maładyja talenty navat zrabili pieradaču na BT. Tak pa-jezuicku chacieli padkupić moładź. Adnak klasa pajšła ŭ inšym kirunku.
Na sustrečy šmat zhadvałasia kramolnaha, adnak samym antysavieckim učynkam adnadušna byŭ pryznany «akt» Taciany Chramiankovaj. Pad čas tvorčaj sustrečy z narodnym mastakom Michaiłam Savickim u Pałacy mastactva jana zadała majstru pendźla pravakacyjnaje pytańnie: «Čamu biełaruskija mastaki malujuć takich ščaślivych kałhaśnic? Voś, naprykład, maja babula žyćcio adpracavała ŭ kałhasie, addała jamu ŭsio zdaroŭje, da taho ž vyhadavała šaściora dziaciej. A joj pryznačyli pensiju ŭ 12 rubloŭ. Dyk čamu joj radavacca?» Atrymaŭsia strašenny kanfuz. Savicki razhubiŭsia. Adna z vykładčyc adviała ŭ bok dziaŭčynu j papiaredziła, što paśla takich pytańniaŭ jana nie pastupić ni ŭ adzin instytut. Dziaŭčynu asabliva nie napužali, bo jana razam ź siabroŭkaj, Śvietaj Słuckaj, u «parnacie» navat nie ŭstupiła ŭ kamsamoł.
Hetaja klasa ŭjaŭlaje saboj ščaślivy vyniatak ź biełaruskaha praviła, kali ŭ roznych nacyjanalnych chaŭrusach svarki ŭźnikajuć čaściej, čym chmary na niebie. Dziesiać hadoŭ tamu «parnataŭcy» adznačyli pieršy jubilej vypusku hetak ža mnahaludna j sardečna. Nadalej vyrašyli źbiracca čaściej.
Aleś Arkuš
